zero media family planning adv

नेवाः जागरण मञ्चपाखें नेवाः ख्यःया थीथी व्यक्तिपिंत ग्वहालि

नेवा: अनलाइन न्युज – Rakesh Maharjan | २०७७ आषाढ २, मंगलबार १५:०६:४३

येँ – नेवाः जागरण मञ्चं लकडाउनया इलय् नेपालभाषा ख्यःया थीथी व्यक्तिपिंत ग्वहालि याःगु दु । लिसें ज्येष्ठ नागरिकतय् सेवा यानाच्वंगु ‘आमा घर’यात नं ग्वहालि याःगु दु ।

मञ्चं ब्यूगु जानकारीकथं लकडाउनया हुनिं समस्याय् लानाच्वंपिं नेवाः ख्यःया व्यक्तिपिंत ग्वहालि यायेगु झ्वलय् न्हियान्हिथं ज्या यानाः नयेमाःपिं व नेवाः आन्दोलनय् सक्रिय ब्वति कयाच्वंपिं बुंगय् न्याम्हेसित ग्वहालि ब्यूगु खः ।

अथे हे, येँय् नेपालभाषाया च्वमिपिं स्वम्हेसित, तोखाय् मजदुरी ज्या यानाः नयाच्वंपिं निम्हेसित, किपुली याकः मिसा छम्हेसित, मनमैजुइ न्हियान्हिथं ज्या यानाः नयेमाःपिं निम्हेसित व येँय् लकडाउन न्ह्यः बेरोजगार जूपिं प्यम्हेसित मञ्चं ग्वहालि याःगु खः ।

मञ्चं थीथी हलंज्वलं व नगद ग्वहालि याःगु खः ।

अथे हे, ज्येष्ठ नागरिकतय् सेवा यानाच्वंगु ‘आमा घर’ व मातातीर्थया वृद्धाश्रमयात नं मञ्चं आर्थिक ग्वहालि याःगु खः ।

नेवाः जागरण मञ्चं अति विपन्न अवस्थाय् दुपिं नेवाः ख्यःया व्यक्तिपिंत निरन्तर ग्वहालि यायेगु जानकारी ब्युसें थथे ग्वहालि यायेमाःपिं सुं दुसा मञ्चय् स्वापू तयाः सुचं बीत इनाप नं याःगु दु ।

 

Categorized in नेवाः