ad prabhu

नेवाःतय्गु थीथी मुद्दाय् साथ बीमाःगु ई वःगु दु...

नेवा: अनलाइन न्युज | २०७७ कार्तिक ६, बिहिबार १३:०२:११

लोप जुयावनाच्वंगु बाजागाजायात ल्यंकेगु आज्जु ज्वना पलिस्था जूगु श्री जट्टाधारी नित्यनाथ एकिकृत बाजं खलःया ग्वसालय् झिन्हुयंकं बाखनय् आधारित कार्यशाला लेन्स तालिम छुं दिं न्ह्यः क्वचागु दु ।

संस्थाया सभापतिपाखें  न्हयगः  सुकुन्दाय् दीप प्रज्वलनया लिसें  मंगल धुनपाखें न्ह्याःगु ज्याझ्वलय् हलिंन्यंकया कोभिड १९ संक्रमणपाखें मदुपिनिगु लुमन्तिइ छगू मिनेट मौनधारण यानाः न्ह्याकूगु खः ।

उगु ज्याझ्वलय् पाहाँ कथं सांस्कृतिक पुनःजागरण अभियानया  केन्द्रिय दुजः लिसें बौद्ध युनिभर्सिटीका प्रोफेसर असोज महर्जन झायादीगु खः ।

पाहाँ असोज महर्जनं नुगःखँ तयेगु झ्वलय् यलया खोना नगर, नेपाः देय्या सभ्यतालिसे स्वानाच्वंगु सिकालीया ऐतिहासिक व  धार्मिक महत्वया विषयस न्ह्यब्वःसें संस्कृतिया छगू ब्वमध्ये संगीत नं छगू जूगुलिं थुकियात संरक्षण, सम्बद्र्धन याइपिं युवा वर्ग जूगुलिं छप्पं छधी जुया राष्ट्रयात योगदान बिइफयेमा भिंतुना देछानादीगु खः ।

उगु तालिम ज्याझ्वःया प्रशिक्षक अशेष डंगोलं झिन्हून्यंकया तालिम क्वचाःगु जूसां नं झी सकलसिके हाकनं मेगु दायित्व थप जूगु हुनि  आदिबासी नेवाः समुदाययात राज्यपाखें जुयाच्वंगु  विभेद नीति विरुद्धय्  दनेमालाः वःगु हुनिं सकलसिगु उतिक्क भूमिका दैगुलिं सकलसिनं नेवाःतय्गु थीथी मुद्दाय् साथ बीमाःगु ई वःगु दु धकाः नुगः खः प्वंकादीगु खः ।

ज्याझ्वलय् प्रशिक्षक अनिलकुमार रञ्जित, किशोर महर्जन, अनिल कुमार रञ्जित व किशोर महर्जनयात मतिनांया चिं लः ल्हाःगु खःसा  श्री जट्टाधारी नित्यनाथ एकिकृत बाजं खलःया सभाअध्यक्ष एवम् मू गुरु  राजेन्द्र महर्जनपाखें ज्याझ्वः समापन यानादीगु खः ।

अथेहे ज्याझ्वलय् ग्वाहालि यानादीपिन्त सुभाय् पौ नं लः ल्हाःगु खः ।

रीदेन महर्जन, किपू

Categorized in नेवाः