Header Nepal rastra bank Adv

नेपाल हाकनं त्यात, श्रीलंकायात बुकल

नेवा: अनलाइन न्युज – ललेन्द्र शाक्य | २०७९ श्रावण १३, शुक्रबार १२:३३:२६

नेपालं साफ यू–२० च्याम्पियनसिपय् मदिक्क निक्वःगुखुसिइ नं त्याकूगु दु । श्रीलंकायात ३–० गोलअन्तरं बुकाः मदिक्क निक्वःगुखुसिइ नं त्याकेधुंकाः नेपाः फाइनल लिक्क नं थ्यंगु दु ।

भारतया भुवनेश्वरय् च्वंगुकालिंगा रंगशालाय् बुधवाः जूगु कासाय् नेपालं मदिक्क निक्वःगुखुसि त्याकूगुलि कप्तान आयुष घलान, कृशिरत्न छुञ्जु व मनग्य नकःमिं गोल याःगु खः ।

कासाया सुरुवातनिसें हे बल पोसेसनय् तसें श्रीलंकायात दबाबय् तःगु नेपालं गोलया नितिं निगूगु हाफ हे पिइमाःगु जूगु खः ।

२४ औं मिनेतय् मोहमेधु मुन्सिफं वान भर्सेस वानया स्थितिइ याःगु प्रहार पोलय् लानाः पिहाँ वःबलय् श्रीलंका अग्रता कायेगुपाखें चुकेजुल । २९ औं मिनेटय् नेपालं गोल याःसां नं फउल जूगु धासें गोलं मान्यता कायेमखन ।

कृतिशरत्न छुञ्जुया कर्नरलिपा रिबाउन्डय् अजय चौधरीया शक्तिशाली प्रहार डिफेन्डरयात लासें गोलय् परिणत जूगु खः । उगु मुभय् आशिष राई नं थे सान थु समिकायात फउल याःगु खनेदूगु खः । ३८ औं मिनेटय् कप्तान आयुष घलानया फ्रिकिकय् सुगम सुवालया हेडर पोस्ट लिक्कपाखें पिहाँ वःबलय् नेपाल अग्रता कायेगु पाखें चुकेजुल ।

४९ औं मिनेटय् कप्तान आयुषं गोल यासें नेपाःयात सुरुवाती अग्रता ब्यूगु खः । अभिषेक वाइबाया क्रसय् श्रीलंकाया गोलरक्षक व डिफेन्डरदथुइ तालमेल मिलेमजूबलय् आयुषं पेनाल्टी बक्स दुनेपाखें उत्कृष्ट फिनिसया नमूना न्ह्यब्वःगु खः ।

६५ औं मिनेटय् कृतिशरत्न छुञ्जुं गोल यासें नेपाःया अग्रता दोब्ब यात । कप्तान आयुषया पासय् छुञ्जुं पेनाल्टी बक्स पिनेपाखें याःगु सशक्त प्रहारं तप्यंक जाली थिइत ताःलात । ८४ औं मिनेटय् मनग्य नकःमिं गोल यासें नेपाःया सहज जीत पक्का जुल । सुगम सुवालया चलाखीपूर्ण पासय् गोलरक्षक पोजिसनय् मदूगु इलय् मनग्यं वान टचय् फिनिस याःगु खः । मनग्य निगूगु हाफया सुरुइ हे सन्दीप कार्कीया थासय् मैदानय् दुहाँ वःम्ह खः ।

इन्ज्युरी ईया थप याःगु न्हापांगु मिनेटय् गोलरक्षक ईश्वर गुरुङं वान भर्सेस वानया स्थितिइ सुन्दर बचाऊ यासें नेपाःया खतरा तापाकाः ब्यूगु खः । इन्ज्युरी ईया थप याःगु स्वंगूगु मिनेटय् अजय चौधरी व अभिषेक वाइबां गोल लाइनपाखें सम्भावित गोलयात क्लियर याःगु खः । मदिक्क निक्वःतक अपराजित जूगु नेपाः निगू कासापाखें खुगू ल्याः मुंकाः शीर्ष थासय् लाःगु दु ।

Categorized in कासा