zero media family planning adv

नेपाल सुपर लिग फुटबल वइगु बैशाखय् जुइगु

नेवा: अनलाइन न्युज – ललेन्द्र शाक्य | २०७७ फाल्गुण १०, सोमबार १५:५७:२२

नेपाल सुपर लिग (एनएसएल) नेपालया न्हापांगु फ्रेन्चाइज लिग वइगु दँ बैशाखय् जुइगु जूगु दु ।

नेपाल स्पोर्टस इण्ड इभेन्ट म्यानेजमेन्ट (एनएसइएम)या ग्वसालय् व अखिल नेपाल फुटबल संघ (एन्फा)या प्राविधिक ग्वाहालिइ बैशाख ११ निसें २५ गतेतक नेपाल सुपर लिग संचालन जुइगु थौं सोमवाः पत्रकार सम्मेलन पाखें जानकारी ब्यूगु खः ।

२०७६ सालय् ग्वसाः ग्वयेगु कथं २०७५ सालय् हे घोषणा जूगु थ्व लिग जुइमफूगु खः । आः आन्तरिक तयारी पूवंगु ग्वसाः खलकं जानकारी ब्यूगु दु । लिगय् प्रदेशया प्रतिनिधित्व यायेगु कथं सहरया फ्रेन्चाइज टिमया सहभागिता जुइगु व अक्सनपाखें फ्रेन्चाइज टिम दयेकेगु एनएसइएमं जानकारी ब्यूगु दु ।

थुगु लिगयात व्यवसायिक लिगया रुपं ट्रायल यायेत्यंगु एन्फा नायः कर्मा छिरिंग शेर्पां धाःगु दु । वं सहिद स्मारक लिग हे मू लिग जुइगु धाःगु दु ।

राउण्डरोविन लिगया आधारय् जुइगु कासाय् मुक्कं १९ गू कासा जुइ । अथेहे फुक्क टिमय् २० म्ह कासामि दइ । टिमया नां व टिम मालिकया जानकारी छगू विशेष समारोह ग्वसाः ग्वयाः थ्वहे महिनाय् सार्वजनिक याइगु जूगु दु । कासामियात ए निसें डी श्रेणीइ ब्वथलाः अक्सन याइ ।

लिगया नितिं एन्फां निलाया ई ब्यूगु शेर्पां धाःगु दु । शेर्पाया कथं उगु इलय् क्लबतसें थः कासामिपिन्त लिगया नितिं रिलिज यायेफइ । लिग दशरथ रंगशालाय् जुइ ।

लिगया नितिं एन्फा व एनएसइएम दथुइ २०१९ जनवरी १ य् हे सम्झौता जूगु खः । थीथी हुनिं निदँ लिपा लाःवंगुलिं थुगुखुसि कम्ती नं लिग सुरुवात याःगु मूर्तरुप बियाः मेगु दँ बांलाक्क यायेफइगु ग्वसाः खलकं जानकारी ब्यूगु दु ।

Categorized in कासा