nepal life 2076 3 18

नेपाल व भारत मैत्रीपूर्ण फुटबल कासा, १–१ गोलया बराबरी

नेवा: अनलाइन न्युज – ललेन्द्र शाक्य | २०७८ भाद्र १७, बिहिबार २२:४७:०६

सुरुवाती अग्रता बचेयाये मफुबलय् अन्तर्राष्ट्रिय मैत्रीपूर्ण फुटबल कासाय् नेपाल भारतलिसे १–१ या बराबरीइ च्वनेमाःगु दु ।

दशरथ रंगशालाय् अञ्जन विष्टं न्हापांगु हाफय् गोल यासें नेपालयात अग्रता ब्यूगु खः । निगूगु हाफय् भारतया नितिं अनिरुध थापां बराबरी गोल याःगु खः ।

नेपाः व भारतदथुइ सन् २०१७ स मुम्बईस लिपांगु मैत्रीपूर्ण कासा जूबलय् नेपाः २–० गोल अन्तरं बूगु खः । दशरथ रंगशालाय् धाःसा सन् २०१५ लिपा थ्व निगू टोली न्हापांगुखुसि म्हितूगु खः । ३६ औं मिनेटय् अञ्जन विष्टं गोल यासें नेपाःयात अग्रता ब्यूगु खः ।

भारतीय डिफेन्डर चिन्ग्लेनसाना सिंह कोनसामं गोलकिपरयात ब्याक पास ब्यूगु बल गोलकिपर गुरप्रित सिंह सन्धुं क्लियर यायेमफूबलय् अञ्जन विष्टं वयात छलेयानाः गोल याःगु खः ।

वसिबें न्ह्यः ३२ औं मिनेटय् नेपालं पेनाल्टी एरिया पिने फ्रिकिक काःगु खः । उकी अञ्जन विष्टं प्रहार याःगु पोष्टलिसें च्वय् बल वंगु खः ।

न्हापांगु हाफय् लिपा लाःगु भारतं निगूगु हाफय् प्यम्ह कासामि हिलाबुला याःगु खः । ५० औं मिनेटय् अनिरुध थापाया फ्रिकिकय् कप्तान सुनिल क्षेत्रीं पोष्ट लिक्कपाखें प्रहार याःगु बल नेपाःया गोलकिपर किरणं बचेयाःगु खः ।

६० औं मिनेटय् भारतया वैकल्पिक कासामि अनिरुध थापां गोल यासें कासा बराबरी याःगु खः । कप्तान सुनिल क्षेत्रीं थ्यंमथ्यं २० यार्ड तापाक्क याःगु शक्तिशाली प्रहार नेपाःया गोलकिपर किरण चेम्जोङं डाइभ यासें बचेयाःसां नं पूर्ण रुपं क्लियर मजुइधुंकाः अनिरुधं गोललाइनपाखें हे बलयात जालीइ थिइकल ।

अनिरुध निगूगु हाफया सुरुइ हे ब्रान्डन फर्नान्डेजया थासय् मैदान दुहाँ वःगु खः ।

६५ औं मिनेटय् नेपालं स्वम्ह कासामि हिलाबुला यासें मनिष डाँगी, सुनिल बल व विशाल राई मैदान दुहाँ वःगु खः । मनिष नवयुगया थासय्, सुनिल आयुष घलान व विशाल सुमन लामाया थासय् मैदानय् दुहाँ वःगु खः ।

८३ औं मिनेटय् भारतया मनवीर सिंहं पेनाल्टी एरिया दुनेपाखें प्रहार याःगु बल गोलपोष्टया दिशा कायेमफुत । इन्जुरी टाइमय् सुमन अर्यालया पासय् मनिष डाँगीया हेडर पोष्ट लिक्कपाखें पिहाँ वंगु खः । नेपाः व भारतदथुइ मेगु कासा आइतवाः जुइ ।

Categorized in कासा