नेवा: अनलाइन न्युज | २०८० भाद्र २२, शुक्रबार ११:०३:३७

मलेसियाय् जुयाच्वंगु आईसीसी मिसा टी–२० विश्वकप एसिया छनोटय् कमजोर ब्याटिङ यायेधुंकाः नेपाः थाइल्याण्डलिसे ४६ रनं बूगु दुसा कासापाखें पिहाँ वःगु दु । थथे बुइधुंकाः नेपाःया ग्लोबल क्वालिफायर थ्यंकेगु आज्जु तकं पूमवंगु दु ।

थाइल्याण्डं ब्यूगु १०६ रन लक्ष्य काःगु नेपालं १९.३ ओभरय् फुक्क विकेट गुमेयानाः ५९ रनय् हे अलआउट जूगु खः ।

नेपाःया नितिं कविता कुँवर अविजित जुसें सर्वाधिक १७ रन दयेकूगु खःसा कविता जोशी व अप्सरी बेगमं समान १० रन मुंकूगु खः । ल्यंदुपिन्सं दोहोरो अंकय् रन दयेके मफुत ।

नेपाःयात अलआउट यायेत थाइल्याण्डया ताई पत्छापुतावोङ व ओनिचा काम्चोन्फुं स्वंगू स्वंगू विकेट काःगु खः । नातयाबुताथमं निगू विकेट काःगु खः ।

वसिबें न्ह्यः बांगीइ च्वंगु युकेएम वाइएसडी ओभलय् टस बुकाः न्हापां ब्याटिङ याःगु थाइल्याण्डं निगू विकेट गुमेयानाः १०५ रन दयेकूगु खः ।

सुरुइ हे विकेट गुमेयायेधुंकाः सुस्त सुरुवात याःगु थाइल्याण्डं ओपनर नानापात खोज्जारो एन्कार्यया अर्धशतक ग्वाहालिपाखें सच्छि रन पूवंकूगु खः । नानापात बोत्तरोएन्काईं ६३ बल म्हितूसें प्यंगू चौकाया ग्वाहालिपाखें अविजित ५९ रन दयेकूगु खः ।

कासाया न्हापांगु ओभरय् हे नेपाःया कविता कुँवरं थाइल्याण्डया ओपन सुवानान खाइआओटोयात रुविना क्षेत्रीपाखें क्याचआउट याःगु खः । तर वधुंकाः नानापात बोच्चारो एन्काई व नाथाकान चान्थमं निगूगु विकेटया नितिं ६८ रनया साझेदारी यासें रन थकाःगु खः ।

चान्थमं ३१ रन दयेकूगु खः । नेपाःया नितिं कविता व पूजां समान छगू विकेट काःगु खः ।

Categorized in कासा