nepal life 2076 3 18

नेपाली फुटबल मू प्रशिक्षक अल्मुताइरीं माफी फ्वन

नेवा: अनलाइन न्युज – ललेन्द्र शाक्य | २०७८ श्रावण १८, सोमबार १७:१३:३८

राष्ट्रिय फुटबल टिमया मू प्रशिक्षक अब्दुल्लाह अल्मुताइरीं माफी फ्वंगु दु ।

थःगु अभिव्यक्तियात कयाः विवाद जुइधुंकाः अल्मुताइरीं सार्वजनिक रुपं माफी फ्वंगु खः ।

अल्मुताइरीं नेपालय् कासामिलिसें खेलकुद पदाधिकारीपिनिगु मानसिकता नं परिवर्तन जुइमाःगु अभिव्यक्ति बिइधुंकाः विवाद जूगु खः । मू प्रशिक्षकं थथे न्वःवायेगु अनुशासन उल्लंघन जूगु धासें अखिल नेपाल फुटबल संघ (एन्फा)या बरिष्ठ न्वकू पंकजविक्रम नेम्वाङ लिसेंया पिन्सं कारवाहीया माग याःगु खः ।

प्रशिक्षक अल्मुताइरीं धाःसा थःम्हं लिपांगु स्वंगू दशकय् नेपाः व मेगु एसियाली देसया फुटबल गुकथं विकास जूगु दु धैगु जक धायेत्यनागु स्पष्टीकरण ब्यूगु दु । वं सामाजिक संजाल फेसबुकय् च्वःगु दु, ‘जि शुभेच्छुक व फुटबलयात माया याइपिं परिवारलिसे सहलह यानाबलय् जिगु धापूया गलत अर्थ जूवंगु महसुस जूगु दु । वप्रति जिं क्षमा फ्वनाच्वना ।’

वं न्ह्यःने धाःगु दु, ‘नेपाली जनता, विशेष यानाः पूर्व कासामि व प्रशिक्षक वा सुनां जिगु सोचबारे गलत थुइकल, इपिं फुक्कप्रति क्षमाप्रार्थी जुया ।’

थःम्हं सुं सुयाप्रति नं गलत नियत मतयागु व नेपाली फुटबल टिमलिसे स्वानाच्वने दूगुलिं लसता पिज्वःगु तकं मू प्रशिक्षक अल्मुताइरीं धाःगु दु ।

Categorized in कासा