coved ad

नेपाली गायकया जापानी म्ये पिहाँवल

नेवा: अनलाइन न्युज – Bijay Ratna | २०७८ पौष २३, शुक्रबार १३:१२:१६

जापानय् च्वनाः वयाच्वंम्ह नेपाःया गायक बज्र गुरुङया छपू जापानी म्ये ‘आइताकु नारु’या म्युजिक भिडियो बिहिवाः छगू ज्याझ्वःया दथुइ पितब्वज्या जुउगु दु । थ्व म्ये गायक गुरुङं हे च्वयादीगु व लसय् हनादीगु म्ये खः । नांजाःम्ह संगीतकःमि नाट्य कला प्रज्ञा प्रतिष्ठानया पूर्व उपकुलपति शम्भुजित बास्कोटा मूपाहाँ कथं झायादीगु उगु म्येया म्यूजिक भिडियो पितब्वज्या ज्याझ्वः वर्ल्डवाइड मिडिया नेटवर्कया ग्वसालय् जुउगु खः ।

ग्वसाः खलःया कजि रामकृष्ण श्रेष्ठया सभानायःसुइ जुउगु उगु ज्याझ्वलय् नेपाःया नांजाःम्ह म्येहालामि ज्ञानु राणायात सम्मान नं याःगु खः ।

पितब्वज्या ज्याझ्वलय् ग्वसाः खलःया कजि रामकृष्ण श्रेष्ठं लसकुस यानादीगु खःसा ज्याझ्वलय् थःगु नुगःखँ तयेगु झ्वलय् गायक गुरुङं थःगु कर्मथलो जापान खःसां जन्मभूमि नेपाःयात सदां लुमंका च्वना धकाः धयादिल ।

मूपाहाँ बास्कोटां थःम्हं संसारया आपालं देश चाहुले धुनागु धकाः धयादिसें जापान धाःसा आःतक मथ्यंनि धकाः धयादिल । ज्याझ्वलय् उगु म्येया कलाकार व प्राविधिकया नापनापं सन्चारकःमिपिन्त नं मतिनाया चिं देछाःगु खः ।

युवा पुस्ताया नांजाःम्ह संगीतकःमि सुरेन्द्र श्रेष्ठया सुर मेलोडी स्टुडियोस रेकर्ड जुउगु थ्व म्येया म्युजिक एरेन्ज दिपेश सिंहं यानादीगु खः । गायक बज्र गुरुङलिसें नम्रता सापकोटां अभिनय यानादीगु थ्व म्येया कोरियोग्राफर निशिला शाक्य खःसा थुकिया किपालुमि व निर्देशन अमृत सुनवार खः ।

Categorized in कला