nepal investment baink

नेपालय् खोट क्यनेमफइपिं नेता गणेशमान, कृष्णप्रसा व मनमोहन जक खः : कांग्रेस नेता प्रधान

नेवा: अनलाइन न्युज – ललेन्द्र शाक्य | २०८० आश्विन २, मंगलबार ११:२१:१०

नेपाली कांग्रेसया नेता लिसें पुलांम्ह रक्षामन्त्री भीमसेनदास प्रधानं नेपालय् खोट क्यनेमफइपिं स्वम्ह नेता गणेशमान सिंह, कृष्णप्रसाद भट्टराई व मनमोहन अधिकारी जक खः धकाः धाःगु दु ।

नेता प्रधानं धयादीगु दु, ‘२०३३ सालनिसें जीवनया लिपांगु क्षणतक जिं गणेशमान सिंहया ग्वाहालिमि जुयाः ज्या यायेखन । वय्कलं सु नेता गुलि लोकतान्त्रिक धैगु म्हसीका आन्दोलनय् म्हसीमखु, सरकारय् वनेधुंकाः जक जुइ धयादीगु दु । दकले अप्वः त्यागी नेताय् वय्कःया हे नां वइ । वयकलं प्रधानमन्त्री पद तकं नयाः मदिल । पार्टी तकं त्याग यानाः ब्यागलं च्वनादिल । नेपालय् खोट क्यने मफइपिंस्वम्ह नेता गणेशमान सिंह, कृष्णप्रसाद भट्टराई व मनमोहन अधिकारी ला खः नि ।’

नेपाली कांग्रेसय् लोकतान्त्रिक संस्कृतिया अभाव दूगु नं नेता प्रधानं ध्वाथुइकूगु दु । वं धाःगु दु, ‘महाधिवेशनय् समूह निर्माण जुइ । तर निर्वाचित जुइधुंकाः नेतृत्वया खँ पालना यायेमाः । चुनाव क्वचायेधुंकाः नं भागबन्डा कायम हे दु । थौं नं शेखर समूहया भेला धैगु न्यनागु दु । थ्व अधिवेशनया हे तयारी जुइ ।’

मेगु प्रसंगय् प्रधानं शिक्षकपिंलिसे सहलह मयाःसे विद्यालय शिक्षा विधेयक हःगुलिं थुकिया विरोध जूगु धाःगु दु ।

नेता प्रधानं धाःगु दु, ‘शिक्षकपिं पंचायतया ईनिसें आन्दोलनय् पलाः तःपिं खः । इपिंलिसे सहलह मयाःसे छगू तर्फी रुपं विधेयक हःगु दु । शिक्षकपिनिगु मानमर्दन जुइगु व लोकतान्त्रिक अधिकार कुण्ठित यायेगु ज्या जुइ फइमखु।’

Categorized in राजनीति