prabhu baink new

नेपालय् कोरोनाया भ्याक्सिनया ट्रायल

नेवा: अनलाइन न्युज – ललेन्द्र शाक्य | २०७७ भाद्र ८, सोमबार ०९:५९:३७

प्रस्तावित कोरोना भाइरसविरुद्धया भ्याक्सिनया ...क्लिनिक ट्रायल...नेपालय् यायेगु तयारी न्ह्यःने वःगु दु । स्वास्थ्य व जनसंख्या मन्त्रालयया प्रवक्ता डा. जागेश्वर गौतमं न्ह्याग्गु नं देसय् दयेकूगु भ्याक्सिन परीक्षण यायेत नेपाः खुल्ला जूगु जानकारी ब्यूगु दु ।

प्रवक्ता डा. गौतमं धाःगु दु, ...क्लिनिकल ट्रायल...य् दुथ्यायेगु नितिं जिपिं खुल्ला जुयागु दु । सुया भ्याक्सिन न्हापां वइ, गुकिया उपयोग यायेगु जुइ ।

भ्याक्सिन तयार यायेत विकसित मुलुकदथुइ धेंधेंबल्ला जुयाच्वंगुलिं उकिया गुणस्तर, प्रभावकारिता व उपलब्धता स्वयाः परीक्षण यायेगु वा मयायेगु निर्णय यायेगु डा. गौतमया धापू दु ।

नेपाल स्वास्थ्य अनुसन्धान परिषदं चीन, रुस व युके अक्सफोर्ड भ्याक्सिन ग्रुपं उत्पादन याःगु भ्याक्सिन ट्रायलया प्रक्रिमया न्ह्यःने यंकागु जानकारी ब्यूगु दु ।

चीनया छगू कम्पनीं कामदारपिन्त ट्रायल यायेत इनाप यासें मन्त्रालययात छ्वयाहःगु दु । थुगु सम्बन्धय् अनुसन्धान यानाः निर्णय यायेत मन्त्रालयं आइतवाः परिषदयात जिम्मा ब्यूगु दु ।

मन्त्रालय स्रोतया कथं होंगसी ग्रुपय् ज्या यानाच्वंपिं कामदार व मेमेपिं यानाः द्वःछिम्हेसिगु नितिं स्वीकृतिया इनाप चीनपाखें वःगु दु ।

(थौं सोमवाः पिदंगु अन्नपूर्ण पोष्ट न्हिपौपाखें)

Categorized in पत्रपत्रिका