zero media family planning adv

नेपालभाषा केन्द्रीय विभागय् मदुम्ह प्रा. श्रेष्ठया श्रद्धाञ्जलि गोष्ठी

नेवा: अनलाइन न्युज – ललेन्द्र शाक्य | २०७७ चैत्र १६, सोमबार ११:२०:०५

नेवाः न्ह्यलुवाःलिसें नेपालभाषा साहित्यया बरिष्ठ समालोचक प्रा. माणिकलाल श्रेष्ठया छगू श्रद्धाञ्जलि गोष्ठी ग्वसाः ग्वःगु दु ।

नेपालभाषा केन्द्रीय विभाग, पाटन क्याम्पसय् थौं सोमवाः सुथय् उगु श्रद्धाञ्जलि गोष्ठी ग्वसाः ग्वःगु खः ।

विभागीय प्रमुख प्रा.डा. ओमकारेश्वर श्रेष्ठया सभापतित्वय् जूगु उगु ज्याझ्वलय् मदुम्ह श्रेष्ठया किपातय् स्वांमाः क्वखायेकाः वय्कःया लुमन्तिइ छगू मिनेट मौनधारण याःगु खः ।

ज्याझ्वलय् विभागया पुलांम्ह प्रमुख डा. सुन्दरकृष्ण जोशीं मदुम्ह प्रा. माणिकलाल श्रेष्ठया योगदानबारे चर्चा यानादीगु खः । नुगःखँ तसें विभागया प्रमुख ओमकारेश्वर श्रेष्ठं मदुम्ह श्रेष्ठया उखेंथुखें लानाच्वंगु थीथी च्वसू, रचना लिसें विशेष भूमिकात मुंकाः अभिलेखीकरण यायेमाःगु खँय् बः बियादीगु खः ।

ज्याझ्वलय् विभागया शिक्षक उपप्राध्यापक रवि शाक्यं मदुम्ह श्रेष्ठया व्यक्तित्व व समालोचकीय प्रवृत्ति केन्द्रीत स्लाइड न्ह्यब्वयादीगु खः ।

ज्याझ्वलय् मदुम्ह प्रा. माणिकलाल श्रेष्ठया छेँजः लिसें विभागया पुलांपिं विभागीय प्रमुख, शिक्षक शिक्षिका व विद्यार्थीपिनिगु उपस्थिति दूगु खः ।

३१ दँतक विभागय् प्राध्यापन याादीम्ह ८९ दँया मदुम्ह श्रेष्ठ थ्व हे चैत्र ३ गते मेडिसिटी अस्पतालय् मदुुगु खः ।

Categorized in नेवाः