नेवा: अनलाइन न्युज – ललेन्द्र शाक्य | २०७८ कार्तिक १४, आइतबार १३:१४:३९

नेपालभाषा विषय कयाः एमए तगि ब्वनिपिं विद्यार्थीपिनिगु नितिं आः येँया प्रदर्शनी मार्गय् च्वंगु रत्नराज्यलक्ष्मी (आर.आर.) कलेजया लुखा नं चाःगु दु । नेपालभाषा एमए तगिं ब्वनेगु नितिं आइतवाःनिसें फाराम बिइगु ज्या खुल्ला याःगु दु ।

आरआर कलेजय् हे ब्वनीपिं नेवाः विद्यार्थीपिनिगु कुतलं उगु कलेजय् नेपालभाषा एमए तगिं ब्वनेदइगु ह्वःताः चूलाःगु खः । उगु कलेजया नेवाः विद्यार्थीपिनिगु संस्था नेवाः विद्यार्थी युनियनया स्यल्लाःगु कुतलं नेपालभाषा एमए तगिंया कक्षा तयेकेगु नितिं ताःलाःगु खः ।

आरआर कलेजय् स्थगित जुइधुंकूगु बीए तगिंया नेपालभाषा कक्षा छुं दँ न्ह्यःनिसें हाकनं ब्वंकेगु ज्या जूगु खः ।

येँया आरआर कलेजय् नियमित रुपं एमए तगिमय् नेपालभाषा ब्वंकेगु जुइधुंकाः यलया पाटन क्याम्पसया नेपालभाषा केन्द्रीय विभागय् ब्वनाच्वंपिं विद्यार्थीपिं नं क्याम्पस हिलाबुला यानाः आरआर कलेजय् वयेफूगु आपालं सम्भावना दूगु खँया जानकारी ब्यूगु दु । कलेज हिलाबुलाया नितिं विद्यार्थीपिन्सं डीन ज्याकुथिइ वनाः छगू निवेदन बीमाःगु व्यवस्था नं यानातःगु दु धकाः जानकारी ब्यूगु दु ।

पाटन क्याम्पसया नेपालभाषा केन्द्रीय विभागय् थुगुसी न्हापांगु सेमेस्टर ब्वनेत भर्ना जूवःपिं विद्यार्थीपिनिगु ल्याः ५० म्ह स्वयां अप्वः थ्यंगुलिं थुकिं यानाः अन सेक्सन ब्वथले मालीगु अवस्था पिहां वःगु खः ।

येँ महानगरपालिकां येँ देय् दुनेया सरकारी व नीजि स्कुलय् नेपालभाषाया माध्यमं स्थानीय विषय ब्वंकेगु व्यवस्था यायेवं उच्च शिक्षाय् नेपालभाषा कयाः ब्वनीपिं विद्यार्थीपिनिगु ल्याः ह्वात्त हे अप्वःगु खः । थथे जूगुलिं आः नेपालभाषाया स्तर व मूल्य मान्यता अप्वइगु आशा नं नेपालभाषा ख्यलं याःगु दु ।

Categorized in नेवाः