prabhu baink new

नेपालभाषा एकेदमीया दुजःपिं छगू म्हसीका

विजयरत्न असंबरे

 

चित्तरञ्जन नेपाली

चित्तरञ्जन नेपाली, चान्सलर

नेपालभाषा एकेदमीया न्हूम्ह चान्सलर चित्तरञ्जन नेपालीया वास्तविक नां नारायणप्रसाद राजभण्डारी खः । वय्कलं गुबलें गुबलें एनपी राजभण्डारीया नामं नं च्वयादी । कविता, निबन्ध, समालोचना व अनुवाद ख्यलय् ज्वःमदुगु योगदान दुम्ह नेपालीजुं दकलय् न्हापां शोककाब्यपाखें ल्हाः न्ह्याकादीगु खःसा लिपा वनाः साहित्यया विविध ख्यलय् सक्रिय जुयादिल । ने.सं. १०७८ या श्रेष्ठ सिरपा त्याकादीम्ह चित्तरञ्जन नेपालीजुं वि.सं. २०१३ य् मदन पुरस्कार नं त्याकादीगु दु । वय्कः छगू कार्यकाल (१११३–१११९) नेपालभाषा एकेदमीया भाइस चान्सलर जुयादीधुंकल । 

 

यज्ञरत्न धाख्वा:

यज्ञरत्न धाख्वा:, भाइस चान्सलर

बाखं विधाय् तसकं ल्हाः न्ह्याःम्ह साहित्यकार भाजु यज्ञरत्न धाख्वाः भाषा, साहित्य व संस्कृतिया ख्यलय् उदारभावं सेवा याना वयाच्वनादीम्ह व्यक्तित्व खः ।नेपालभाषाया साहित्य व संगीतया ख्यलय् छगू प्रतिष्ठित सिरपाःकथं कयातःगु “दान्यहिरा सिरपाः” व “दान्यहिरा हःपाः सिरपाः” नीस्वनेत कोष दयेकादीम्ह यज्ञरत्न धाख्वा:जुं थुगु सिरपाः थः अबुजु दानरत्नया नामं “दान” अले थःगु नांया ‘य’ अले थः तिरिमय्जु हिरादेवीया नामं ‘हिरा’ खँग्वः ल्ह्ययाकयाः दान्यहिरा धकाः नां छुनादीगु खः । नेपालभाषा एकेदमीपाखें दँय्दसं लःल्हाना वयाच्वंगु थ्व सिरपा ज्याझ्वलय् दाता व बाखं च्वमि यज्ञरत्न धाख्वाजुं दँय्दसं छगू छगू बाखं सफू नं च्वया: पिथना वयाच्वनादीगु दु । 

 

मल्ल के. सुन्दर

मल्ल के. सुन्दर, सदस्यसचिव

कविता, निबन्ध, उपन्यास व समालोचना विधाय् तसकं ल्हाः न्ह्याःम्ह मल्ल के. सुन्दरया थौंकन्हय्या म्हसिका धइगु मानवअधिकारवादी नेता, भाषिक आन्दोलनया न्ह्यलुवाकथं न्ह्यःने लानाच्वंगु दु । आदिवासी जनजाति व नेवाः अधिकारया आन्दोलनया छम्ह ज्वः मदुम्ह नेता मल्ल के. सुन्दरं साहित्यया थीथी विधाय् च्वसा न्ह्याकादीगु दु । ‘व लँपु : थ्व पलाः’ वय्कःया दकलय् लिपांगु उपन्यास कृति खः । नेवाः देय् दबू, नेपालभाषा मंकाः खलः, नेपालभाषा परिषद आदि थेंज्याःगु भाषिक व साहित्यिक संघसस्थाय् थीथी नेतृत्वदायी भूमिका म्हितादी धुंकूम्ह मल्लजु नेपालभाषा एकेदमीया सचिव जुयाः नं ज्या यानादी धुंकल ।

 

डा. पुष्पराज राजकर्णिकार 

डा. पुष्पराज राजकर्णिकार, दांभरिं

नेपाःया अर्थशास्त्रया ख्यलय् नांजाःम्ह व्यक्तित्व डा. पुष्पराज राजकर्णिकारजु नेपालभाषाया साहित्य ख्यलय् नं उतिकं हे दुग्यंक च्वसा न्ह्याका वयाच्वनादीम्ह खः । विशेष यानाः कविता, समालोचनालिसें छधाः प्याखं नं च्वयादीम्ह डा. राजकर्णिकारजुं नेपालभाषा मंकाः खलः यलया नायः जुयाः नं ज्या यानादी धुंकूम्ह खःसा मां भाय् थकाय्या निंतिं न्ह्यचिला वयाच्वनादीम्ह न्ह्यलुवा खः ।

 

प्रा. प्रेमशान्ति तुलाधर 

प्रा. प्रेमशान्ति तुलाधर, प्राज्ञ

नेपालभाषाया अध्यापन पेशाय् ताः ई न्ह्यव:निसें सक्रिय जुया वयाच्वनादीम्ह प्रा. प्रेमशान्ति तुलाधर मय्जु विशेष यानाः नेपालभाषाया साहित्यिक इतिहासया अन्वेषक खःसा वय्कः मय्जु छम्ह ज्वःमदुम्ह साहित्य समालोचक नं खः । लोकसाहित्य परिषदया दुजः, नेपालभाषा साहित्य गुथिया दुजः जुयादी धुंकूम्ह वय्कः मय्जु थ्वसिबें न्हापा नेपालभाषा एकेदमीया प्राज्ञ दुजःकथं ज्या यानावयाच्वनादीम्ह खः ।

 

प्रा.डा. चन्द्रमान बज्राचार्य

प्रा.डा. चन्द्रमान बज्राचार्य, प्राज्ञ

नेपालभाषाया साहित्य ख्यलय् छम्ह ज्वःमदुम्ह समालोचककथं म्हसिका दुम्ह डा. चन्द्रमान बज्राचार्यया थीथी विषयया प्रबन्ध च्वसुत नं पिहां वयाच्वंगु दु । निबन्ध नं च्वयादीगु दु । वय्कः डा. बज्राचार्यजु नं अध्यापनया ज्या यानाच्वनादीम्ह व्यक्तित्व खः ।

 

लक्ष्मीदास मानन्धर 

लक्ष्मीदास मानन्धर, प्राज्ञ

भाषासेवी, समाजसेवीया रुपय् तसकं नांजाःम्ह लक्ष्मीदास मानन्धरयात आपा:सिनं लक्ष्मीदास साहुजी धकाः नं म्हसिउ । धर्म संस्कृति व नेपालभाषा ह्यमि भाजु मानन्धरजु नेपालभाषा एकेदमीया छगू कार्यकाल दांभरि जुयादी धुंकूम्ह खःसा नेपालभाषाया शिक्षाया विकासया लँपुइ नुगः क्वसायेका वयाच्वनादीम्ह खः । वय्कः नेपालभाषा ब्वंकीगु ब्वनेकुथि जगत सुन्दर ब्वनेकुथिया नायः नं खः । 

 

डा. तेजरत्न कंसाकार 

डा. तेजरत्न कंसाकार, प्राज्ञ

डा. तेजरत्न कंसाकार नं प्राध्यापनया ज्या याना वयाच्वनादीम्ह व्यक्तित्व खः । भाषा विज्ञानया विशेषज्ञ डा. कंसाकारजु नेपालभाषाया साहित्ययात अंग्रेजी भाषां भाय् हिलाः ज्वःमदुगु योगदान बियावयाच्वनादीम्ह व्यक्तित्व खः । विशेष यानाः नेपालभाषा व भाषा विज्ञान अले ए डिक्सनरी अफ क्लासिक नेवारी ल्यांग्वेज वय्कःया ज्वःमदुगु सफू खः ।

 

 नजरराम महर्जन

 नजरराम महर्जन, प्राज्ञ

किपूया नजरराम महर्जनयात नेपालभाषा साहित्य ख्यलय् छम्ह तसकं ल्हाःज्वःम्ह उपन्यासकारया रुपय् कयातःगु दु । तःगू मछि उपन्यास च्वयादी धुंकूम्ह उपन्यासकार महर्जन भाजुया दकलय् न्हूगु उपन्यास “थ्वयाच्वंगु सः” खः । नेपालभाषा एकेदमी थ्वसिबें न्हापा नं प्राज्ञ दुजः जुयादी धुंकूम्ह नजरराम महर्जनजुया साहित्य ख्यलय् छगू बिस्कं हे म्हसीका दु । 

 

विजयरत्न असंबरे 

विजयरत्न असंबरे, मनोनित प्राज्ञ

विशेष यानाः फिल्म सम्बन्धी च्वसाय् तसकं ल्हाः न्ह्याःम्ह फिल्म समीक्षक व फिल्म निर्देशक विजयरत्न असंबरे नं ताई न्ह्यव:निसें नेपालभाषा च्वज्याय् ज्वःमदुगु योगदान बिया वयाच्वनादीम्ह खः। भाषा साहित्य व संकिपायात थःगु विशेष मतिना प्वंका वयाच्वनादीम्ह असंबरे भाजु साहित्य ख्यलय् नं ल्हाः न्ह्याका वयाच्वनादीम्ह खः । विशेष यानाः चिबाखं, हाइकू व ध्याचु वय्कःया च्वसां पिदनाच्वंगु दु ।

 

शशीकला मानन्धर 

शशीकला मानन्धर, मनोनित प्राज्ञ

नेपालभाषाया साहित्य ख्यलय् दकलय् न्हापांम्ह मिसा उपन्यासकारकथं बिस्कं म्हसिका दुम्ह साहित्यकार शशीकला मानन्धरं मय्जु, बाखं व छधा: प्याखं नं च्वयादीगु दु । वय्कःया तःगू मछि सफू पिदने धुंकूगु दुसा भाषा व साहित्य ख्यलय् वय्कः मय्जुया थ्व योगदान तसकं च्वछाये बहःजू ।

 

दीपक तुलाधर 

दीपक तुलाधर, मनोनित प्राज्ञ

नेवाः मोडर्न इंग्लिश स्कूलया संस्थापक दीपक तुलाधर भाजु थौंकन्हय् मांभासं शिक्षा बिइकेगु अभियानय् न्ह्यचिला च्वंम्ह छम्ह ज्वःमदुम्ह व्यक्तित्व खः । थीथी ब्वनेकुथिइ नेपालभाषा नं ब्वंकेगु कुतलय् न्ह्यज्याना च्वनादीम्ह तुलाधर भाजु थौंकन्हय् थाय्थासय् वना: नेवाः बस्ती नेवाः स्कूलया अभियान न्ह्याका वयाच्वनादीगु दु ।