prabhu baink new

नेपालभाषा एकेदमिया स्वपाः सफू विमोचन नेवाः युट्युबपाखें प्रत्यक्ष प्रशारण जुइगु

नेवा: अनलाइन न्युज – Rakesh Maharjan | २०७७ श्रावण १५, बिहिबार १८:४९:१८

येँ – नेपालभाषा एकेदमिं स्वपाः सफू पिथनेत्यंगु दुसा विमोचन ज्याझ्वःयात नेवाः युट्युबं प्रत्यक्ष प्रशारण यायेत्यंगु दु ।

एकेदमिया ख्वाःपौ नेवाः प्रज्ञा ल्याः ४, प्रा.डा. चन्द्रमान वज्राचार्यया समालोचना सफू ‘ल्हाःचिं’ व यज्ञरत्न धाख्वाःया बाखंमुना ‘चं अजि’ सफू नेपालभाषा एकेदमिं पिथनेत्यंगु दु ।

शताब्दी पुरुष सत्यमोहन जोशीया ल्हातं स्वपातं सफूया विमोचन जुइगु जानकारी एकेदमिं ब्यूगु दु ।

वइगु शनिवाः (साउन १७ गते) न्हिनसिया १ ताः इलय् यल बखुंबहाः, सत्यमोहन जोशीया छेँय् दयेकाच्वंगु लोकसाहित्य भवनय् विमोचन ज्याझ्वः जुइत्यंगु दु । 

विमोचन ज्याझ्वःया प्रत्यक्ष प्रशारण जुइगु अले उकियात नेवाः युट्युबया फेसबुक पेजपाखें नं स्वयेफइगु जानकारी नेवाः युट्युबं ब्यूगु दु । नेवाः युट्युबं प्रत्यक्ष प्रशारण ज्याझ्वःयात लाइक व कमेन्ट यायेत स्वकुमिपिंत इनाप नं याःगु दु ।

 

Categorized in नेवाः