nepal investment baink

नेपालं यूएईयात त्याकल, एसिया कपय् छनोट

नेवा: अनलाइन न्युज – ललेन्द्र शाक्य | २०८० बैशाख १९, मंगलबार १२:४५:००

एसीसी प्रिमियर कपया फाइनलय् यूएईविरुद्ध उत्कृष्ट कासा म्हिताः त्याकूगु दुसा थथे त्यायेधुंकाः आः नेपाः एसिया कपय् छनोट जूगु दु ।

एसिया कप सेप्टेम्बर १ निसें १४ तारिखतक पाकिस्तानय् जुइगु जूगु दु । नेपालं भारत व पाकिस्तान दुथ्याःगु पुचः ए पाखें एसिया कप म्हिती ।

नेपालं यूएईयात ७ विकेटं बुकुसें एसिया कपय् थःगु थाय् पक्का याःगु खः ।

किपूया त्रिवि क्रिकेट मैदानय् न्हापां टस त्याकाः नेपालं फिल्डिङ ल्ययेधुंकाः ब्याटिङय् क्वाहाँ वःगु यूएईं खराब कासाया ब्वज्या यासें २७.२ ओभरय् १०६ रन दयेकेधुंकाः वा वयाः कासा स्थगित जूगू खःसा ल्यंदूगु कासा हाकनं हाकनं म्हितूकूगु खः । थौं मंगलवाः यूएईं नेपाःयात ११८ रनया लक्ष्य न्ह्यब्वःगु खः ।

यूएईयात सामान्य लक्ष्यय् पनेगु झ्वलय् नेपाःया ललित राजवंशीं ४ विकेट काःगु खः । अथेहे, करण केसी व सन्दीप लामिछानें २–२ विकेट काःबलय् सोमपाल कामी व गुल्सन झा नं समान छगू छगू विकेट काःगु खः ।

यूएईं ब्यूगु सामान्य लक्ष्य लिनाः जवाफी ब्याटिङय् क्वाहाँ वःगु नेपालं ३०.३ ओभरय् जक स्वंगू विकेट गुमेयानाः लक्ष्य पूवंकूगु खः ।

नेपाः त्याःगुलि नायक जूम्ह गुल्सन झा नं शानदार अर्धशतक प्रहार याःगु खः । वं ८४ बलया सामना यासें खुगू छक्का व स्वंगू चौकाया ग्वाहालिं ६७ रनया विष्फोटक पारी म्हितूगु खः ।

अथेहे, भीम सार्कीं ७२ बलय् प्यंगू चौका प्रहार यासें नटआउट ३६ रन दयेकूगु खः ।

ओपनरपिं कुशल भुर्तेल १ रन व आशिफ शेख ८ रनय् आउट जूगु अवस्थाय् कप्तान रोहित पौडेल नं क्रिजय् च्वनेमफुत ।

बलिङपाखे यूएईया रोहन मुस्ताफां निगू व आएन अफ्जल खानं छगू विकेट काःगु खः ।

Categorized in कासा