coved ad

नेपालं त्याकल एसियन सेन्ट्रल जोन मिसा भलिबलया उपाधि

नेवा: अनलाइन न्युज – ललेन्द्र शाक्य | २०७८ पौष १३, मंगलबार १५:३७:५८

साविक विजेता नेपालं उज्वेकिस्तानयात उत्कृष्ट कासा प्रदर्शन यासें बुकुसें एसियन सेन्ट्रल जोन मिसा भलिबल च्यालेञ्ज कपया उपाधि थःपिनिगु ल्हातय् लाकूगु दु ।

बंगलादेशया ढाकाय् मंगलवाः जूगु प्रतिस्पर्धात्मक व रोमाञ्चक बिजं (फाइनल) कासाय् नेपालं उज्वेकिस्तानयात ३–२ या सेटय् बुकूगु खः । अतिकं हे प्रतिस्पर्धात्मक न्हापांगु सेट नेपालं ट्राइब्रेकरय् २६–२४ ल्याखं त्याकूगु खः ।

सुरुवातनिसें हे उज्वेकिस्तानं कासाय् अग्रता काःसां नं नेपालं १८–१८ य् ल्याः बराबरी याःगु खः । वधुंकाः नं अतिकं प्रतिस्पर्धात्मक कासा २४–२४ स थ्यंबलय् नेपालं ट्राइब्रेकरय् त्याकूगु खः ।

निगूगु सेटय् नं उज्वेकिस्तानं सुरुवातनिसें हे अग्रता काःगु खः । नेपाः १९–२३ ल्याखं ल्यूने लाःगु अवस्थाय् उज्वेकिस्तानया प्रशिक्षकं कासा भावना अःखः निर्णायकया निर्णययात मानेमयाःबलय् रेफ्रीं ह्याउँगु कार्ड नकूगु खः । गुकिं यानाः नेपालं ल्याः मुंकूसें सर्भिस नं कायेखंगु खः ।

वधुंकाः नेपालं कासा २४–२४ स थ्यंकेत सुथां लाःसां नं निगूगु सेट ट्राइब्रेकरय् २४–२६ ल्याखं गुमेजुइधुंकाः उज्वेकिस्तानं कासाय् पुनरागमन याःगु खः ।

स्वंगूगु सेटय् धाःसा नेपालं २५–१५ ल्याखं सहज रुपं हे त्याकुसें कासाय् २–१ या अग्रता दयेकल । १०–११ ल्याखं ल्यूने लाःगु नेपालं मदिक्क ८ ल्याः मुंकाः १८–११ या अग्रता दयेकूसें कासा २५–१५ ल्याखं सहज रुपं त्यायेत ताःलात ।

तर प्यंगूगु सेटय् उज्वेकिस्तानं हाकनं कमब्याक यासें २५–२२ ल्याखं सेट थःगु पक्षय् लाकुसें कासा २–२ या अवस्थाय् थ्यंकल । वधुंकाः न्यागूगु व निर्णायक सेट १५–११ ल्याखं त्याकूसें नेपालं उपाधि थःगु ल्हातय् लाकेत ताःलात ।

Categorized in कासा