zero media family planning adv

नेपालं क्रिकेटय् भुटानयात बुकल

नेवा: अनलाइन न्युज | २०७६ मङ्सिर १९, बिहिबार १२:५३:३०

कप्तान ज्ञानेन्द्र मल्लया कीर्तिमानी शतकलिसें नेपालं भुटानयात १४१ रनया तःधंगु अन्तरं बुकूगु दु ।

१३ क्वःगु साग अन्तर्गत जूगु क्रिकेट कासाय् नेपालं २३७ रनया विशाल लक्ष्य ब्यूगु खः । लिसलय् भुटानं २० ओभरय् ६ विकेट गुमेयानाः ९५ रन जक दयेकेफूगु खः । भुटानया आरएम दोर्जीं सर्वाधिक २७ रन दयेकूगु खः ।

नेपाःया पारस खड्कां २ विकेट काःबले करण केसी, ललितनारायण राजवंशी व पवन शर्राफं १–१ विकेट काःगु खः ।

ज्ञानेन्द्र मल्लया शतकलिसें तःंगु स्कोर

थ्वसिबें न्ह्यः टस बुकाः ब्याटिङ याःगु नेपालं २० ओभरय् ३ विकेट गुमेयानाः २३६ रन दयेकूगु खः । थ्व टी–२० अन्तर्राष्ट्रिय कासाय् नेपाःया सर्वाधिक तःधंगु स्कोर खः ।

नेपाःया सुरुवात बांलाःगु खः । कप्तान मल्ल व पूर्व कप्तान पारस खड्कां न्हापांगु विकेटया नितिं १०८ रनया साझेदारी याःगु खः ।

पारस ५७ रनय् आउट जूगु खः । स्वंगूगु ल्याखय् वःम्ह रोहितकुमार पौडेल ६ रनय् हे आउट जूगु खः ।

वधुंकाः कप्तान मल्ल व उपकप्तान दीपेन्द्र सिंह ऐरीं ८० रनया साझेदारी याःगु खः । ५३ बलय् शतक पूवंकूम्ह कप्तान मल्ल थप निगू बल सामना यानाः १०७ रनय् आउट जूगु खः ।

५५ बलया सामना याःम्ह मल्लं ५ चौका व ९ छक्का दाःगु खः । अन्तर्राष्ट्रिय टी–२० इ थ्व मल्लया न्हापांगु शतक खः । लिसें १०७ रन टी–२० इ नेपाली ब्याट्सम्यानं दयेकूगु सर्वाधिक स्कोर नं खः ।

थ्वसिबें न्ह्यः नेपाःया नितिं छम्ह जक टी–२० शतक पूर्वकप्तान पारसया नामय् दूगु खः ।

Categorized in कासा