नेवा: अनलाइन न्युज | २०८० भाद्र १८, सोमबार ११:५२:११

कतारयात ९ विकेटं बुकाः नेपाः मलेसियाय् जुयाचवंगु आईसीसी वुमन्स टी–२० विश्वकप एसिया छनोटय् समूह ए पाखें सेमिफाइनलय् दुहाँ वंगु दु ।

कतारं ब्यूगु ७५ रनया लक्ष्य नेपालं १०.३ ओभर म्हिताः छगू विकेट गुमेयानाः पूवंकूगु खः । नेपाःया जीतय् काजल श्रेष्ठं सर्वाधिक ३२ रन दयेकूगु खः ।

समूह ए स मदिक्क प्यक्वःगुखुसि त्याकूगु नेपाःया प्यंगू कासापाखें ८ ल्याः जूगु दु । नेपालं आः समूहया लिपांगु कासाय् बुधवाः यूएईलिसे म्हितीगु जूगु दु । उगु कासा समूह विजेता जुइगु नितिं निर्णायक जुइसा युएईं आः बहराइनलिसे म्हिताच्वंगु दु ।

थ्वसिबें न्ह्यः ब्याटिङय् खनेदूगु समस्या थुगु कासाय् नेपालं छुं हदतक सुधार याःगु खः । काजल श्रेष्ठ व सीता राना मगरं न्हापांगु विकेटया नितिं ७ ओभरय् ४७ रनया साझेदारी याःगु खः ।

२८ बल म्हिताः प्यंगू चौका तकं प्रहार याःम्ह काजलयात न्हयगूगु ओभरया लिपांगु बलय् कतारया सबिजा पनायानं बोल्ड याःगु खः ।

वधुंकाः सीता व इन्दु जानाः नेपाःयात त्याकेगु ईतक थ्यंकूगु खः । उपिं निम्हेस्यां अविजित २८ रनया साझेदारी याःगु खः । इन्दुं १२ बल म्हिता स्वंगू चौकाया ग्वाहालिपाखें अविजित २० रन दयेकूगु खः । अथेहे, सीतां २३ बलय् अविजित १७ रन दयेकूगु खः ।
वसिबें न्ह्यः युकेएम वाई एसडी क्रिकेट ओभलय् टस बुकाः न्हापां ब्याटिङ याःगु कतारं निर्धारित २० ओभरय् ७ विकेट गुमेयानाः ७३ रन दयेकूगु खः ।

कतारया नितिं साची डादवालं सर्वाधिक २१ रन दयेकूबलय् ओपनर एलिना खानं १५ रन व कप्तान आयशां १० रन मुंकूगु खः । एन्जेलाइन मरे१४ रनय् अविजित जूगु खः ।

नेपाःया नितिं किफायती बलिङ तकं याःम्ह इन्दुं ४ ओभरय् १० रन जक खर्चेयानाः ३ विकेट काःगु खः । वं १७ औं ओभरया स्वंगूगु , न्यागूगु व खुगूगु बलय्विकेट काःगु खः । पुजा महतो व कविता जोशीं समान छगू छगू विकेट काःगु खः ।

सन् २०२४ य् जुइगु वुमन्स विश्वकपया नितिं एसिया क्षेत्रया छनोटय् ११ गू टोलीं प्रतिस्पर्धा यानाच्वंगु दु ।

समूह ए स खुगू व समूह बी स न्यागू टिम दु । निगुलिं समूहपाखें शीर्ष निगू टोली सेमिफाइनलय् थ्यनी व फाइनल थ्यनीगु निगू टोली जक ग्लोबल क्वालिपायर्सय् छनोट जुइ ।

नेपाःया लक्ष्य नं फाइनल थ्यंकाः ग्लोबल क्वालिफायर्सय् छनोट जुइगु जूगु दु ।

Categorized in कासा