Arin Enterprises

नेपाःया नितिं न्हूम्ह चिनियाँ राजदूत छङ् सोङ नेपाः वइन

नेवा: अनलाइन न्युज – ललेन्द्र शाक्य | २०७९ मङ्सिर ७, बुधबार १५:१५:२९

चीनं नेपालय् खाली जुयाच्वंगु राजदूत पदय् चिनियाँ विदेश मन्त्रालयया एसिया विभागया उपमहानिर्देशक छङ् सोङयात छ्वयाहयेगु तयारी जूगु दु ।

नेपाःया नितिं पूर्व राजदूत होउ यान्छीं थःगु प्यदँया कार्यकाल क्वचायेकाः वंगु २५ अक्टोबरय् स्वदेश लिहाँ वनेधुंकाः चीनं न्हूम्ह राजदूतया रुपं छङ् सोङयात येँय् छ्वयाहयेत्यंगु खः ।

चीनं राजदूतय् कूटनीतिज्ञ छङ् सोङ्यात नियुक्त यायेगु चर्चा जूसां नं नेपाःयात एग्रिमोया नितिं याःगु औपचारिक जानकारी ब्यूगु मदुनि । परराष्ट्र मन्त्रालय उच्च स्रोतया कथं बेइजिङय् च्वंगु नेपाली राजदूतावासयात ब्यूगु अनौपचारिक जानकारी बाहेक आःतक छुं औपचारिक जानकारी वा पौ धाःसा थ्यंकूगु मदुनि ।

परराष्ट्र उच्च स्रोतं धाःगु दु, ‘छङ् सोङ् झीगु मुलुकया नितिं म्हस्यूम्ह कूटनीतिज्ञ हे खः । तर आःतक जिमित छुं औपचारिक पौ वा जानकारी धाःसा थ्यंकूगु मदुनि ।’

नियुक्त जूम्ह धाःम्ह कूटनीतिज्ञ छङ् सोङ् आः चीनया विदेश मन्त्रालय अन्तर्गत दूगु एसिया मामिला विभागय् दुपिं न्याम्ह उपमहानिर्देशकमध्ये छम्ह खः । छङ् सोङं नेपाः व अफगानिस्तानलिसें दक्षिण एसियाली मुलुकत स्वयाः वयाच्वंगु दु ।

चिनियाँ विदेश मन्त्रालया विदेश मामलाया महानिर्देशकया जिम्मेवारीइ लिउ चिनसङ दु । अथेहे, न्याम्ह उपमहानिर्देशकय् शेन मिन्चुवान (मिसा), छङ् सोङ्, पाङ हङ (मिसा), छङ् साओछङ् व लियाङ नियान्जुन दु ।

राजदूत यान्छीं सन् २०१८ या डिसेम्बरनिसें प्यदँतक नेपालय् राजदूतया रुपं ज्या याःगु खः । वया कार्यकालय् सन् २०१९ स चिनियाँ राष्ट्रपति सी जिनपिङं राजकीय नेपाः भ्रमण याःगु खः । वबाहेक वया कार्यकालय् हे नेपाः व चीनदथुइ महत्वं जाःगु सम्झौता व भ्रमणत तकं जूगु खः ।

वंगु अक्टोबरय् क्वचाःगु चिनियाँ कम्युनिष्ट पार्टी (सीसीपी) या २० क्वःगु महाधिवेशन लिपा चीनं नेपालय् न्हूम्ह राजदूत छ्वयाहयेत्यंगु खः ।

Categorized in अन्तर्राष्ट्रिय