Newa Ekata Diwas Gosthi Adv

नेकपा मिलेयायेत सतक मार्गं गोप्य रुपं वःपिं स्वम्ह चिनियाँ सु खः ?

नेवा: अनलाइन न्युज – ललेन्द्र शाक्य | २०७७ पौष १९, आइतबार १४:४९:५७

नेपाल कम्युनिष्ट पार्टीयात कुचा मयायेत चीनया सक्रियता खुलस्त जुइधुंकूगु दु । चिनियाँ कम्युनिष्ट पार्टीया विदेश विभागया उपमन्त्री गुओ यचौ ६ म्ह दुजःया पुचः ज्वनाः प्यन्हु नेपाः च्वंगुया आज्जु थ्वहे खः । तर, व वये छुं दिं न्ह्यः हे चिनियाँ पुचः नेपाः वयेधुंकूगु खुलासा जूगु दु ।

भारतीय पत्रिका द हिन्दुस्तान टाइम्सं स्वम्ह चिनियाँ पुचः सतक मार्गं नेपाः दुहाँ वःगु खुलासा याःगु खः । कोरोना भाइरसया जोखिमया हुनिं चीनपाखें हवाई उडान बन्द जूगुलिं उगु पुचः सतक मार्गं उत्तरपाखें दुहाँ वःगु खः । तिब्बत जुयाः नेपाः दुहाँ वःगु पुचलं गोप्य रुपं नापलायेगु ज्या याःगु हिन्दुस्तान टाइम्सं न्ह्यथंगु दु ।

यचौया पुचः आइतवाः चार्टर्ड विमानपाखें वयाः बुधवाः लिहाँ वंगु खः । पुचलं राष्ट्रपति विद्यादेवी भण्डारी, प्रधानमन्त्री  केपी शर्मा ओली, नेकपाया छगू पक्षया नायःपिं पुष्पकमल दाहाल प्रचण्ड व माधवकुमार नेपाल, बरिष्ठ नेता झलनाथ खनाल, न्वकू बामदेव गौतम, पूर्व सभामुख कृष्णबहादुर महरा लिसेंयापिन्त नापलाःगु खः । चिनियाँ दूतावासय् जनार्दन शर्मा व डा. राजन भट्टराईयात सःताः एकताया सूत्रबारे सहलह याःगु खः । थुकियात चीनया खनेदूगु सक्रियताया रुपं काःगु दु ।

तर, चीनं लिपांगु इलय् छद्म भेषय् सक्रियता अप्वयेकाः यंकूगु दु । नेकपा विवाद मिलेयायेत नं छद्म पुचm सक्रिय जूगु खः । उगु पुचलय् जेकुन लाई, डोंगमे हुआंग व योंगलिंग चोंग खः । इमिसं गोप्य रुपं नेपाःया राजनीतिक दलया नेतालिसे सम्पर्कय् च्वनाः ज्या यानाः वयाच्वंगु खः । हिन्दुस्तान टाइम्सं इपिं गोप्य रुपं ल्यूनेपाखें ज्या यानाः वयाच्वंगु खुलासा याःगु दु । नेपाःया राजनीतिक दल व नेतापिन्त प्रभाव यायेत इमित योजनाबद्ध तरिकां तयार यानाः गोप्य रुपं सक्रिय याःगु खः ।

Categorized in पत्रपत्रिका