nepal investment baink

नृत्यकलाया बःचाहाकलं म्हसीका सफूया पितब्वज्या

नेवा: अनलाइन न्युज – विजयरत्न | ने.सं. ११४४ सिल्लागा खस्थि (२०८० चैत्र २ गते)

नेपालभाषाया संकिपा ख्यलय् ‘ग्वाज्यःचा’ संकिपाः म्हिता दुहाँ वःम्ह कलाकार राजु महर्जन जुजु छम्ह अभिनय ख्यलय् पलाः क्वातुके धुंकुम्ह कलाकार खः । वयागु म्हसीका थुलि जक मखसे च्वज्यापाखे नं ल्हाः ज्वःम्ह च्वमि कथं नं खनेदयाः वयाच्वंगु दु ।

थ्वहे झ्वलय् राजु महर्जन जुजुया खुगूगु सफू ‘नृत्यकलाया बःचाहाकलं म्हसीका’ सफूया पितब्वज्या यलया ज्यापु समाजया हलय् बुधवाः जुउगु दु । थ्व सफूया सम्पादक नानीहेरा शाक्य खः ।

सफूया प्रकाशक रत्नमान डंगोल सभानायः व माननीय बागमती प्रदेश दुजः लिसें पूर्वमन्त्री रामकृष्ण चित्रकारया मूपाँहासुइ जूगु उगु ज्याझ्वलय् प्राज्ञ नारायणदेवी प्रधान व नेपालभाषा केन्द्रीय विभागया प्रमुख डा. राजनलाल जोशीं मंकाः कथं सफू पितब्वज्या यानादीगु खः।

नेपालय् लोप जुजुं वनाच्वंगु सम्पदायात संरक्षण यायेगु व अन्तर्राष्ट्रिय जगतय् नेपाल लोककला सांस्कृतिक परम्परायात कालबिल यायेगु अले नेपाःयात विश्व समुदायया दथुइ सांस्कृतिक सम्पदाया धनी देय् धकाः म्हसीका विइगु आज्जु ज्वनाः थुगु सफू पिकयाःगु च्वमि राजु महर्जन “जुजुं” धयादिल ।

राजु महर्जन जुजुं थ्वसिबें न्ह्यः ह्वयाच्वंगु स्वाँ, श्रीकृष्ण भजन संग्रह, ह्वय् त्यंगु स्वा, कोपिला, मंगलकृर्तन पिकयादी धुंकल ।

Categorized in कला