Arin Enterprises

निवर्तमान सांसदपिं राजेन्द्र श्रेष्ठ व रामवीर मानन्धरया जफत जुल ‘जमानत’

नेवा: अनलाइन न्युज – ललेन्द्र शाक्य | २०७९ मङ्सिर ८, बिहिबार १५:३६:४८

निवर्तमान सांसदपिं जनता समाजवाादी पार्टी (जसपा)या राजेन्द्र प्रसाद श्रेष्ठ व नेकपा एमाले परित्याग याःम्ह रामवीर मानन्धर येँ निर्वाचन क्षेत्र नम्बर ७ पाखें हाकनं प्रतिनिधि सभा दुजलय् उम्मेदवार जूगु खः । तर, निम्हेस्यां जमानत बचेयाये मफुत ।

उगु क्षेत्रया मुक्कं सदर मत ३६ हजार ६१ जूगु दु । राजेन्द्र प्रसाद श्रेष्ठं मुक्कं सदर मतया ६.८ प्रतिशत व रामवीर मानन्धरं ३.४ प्रतिशत मत काःगु खः ।

सदर मतया १० प्रतिशत मथ्यंपिं उम्मेदवारया जमानत जफत जुइगु कानूनी व्यवस्था दु । कानून कथं प्रतिनिधि सभापाखेया उम्मेदवारं मनोनयन दर्ता याःबलय् धरौती कथं रकम झिद्वः तका जम्मा यायेमाःगु खः ।

२०७४ सालया निर्वाचनय् वहे क्षेत्रपाखें रामवीर मानन्धर त्याःगु खः । उगु इलय् मानन्धरं १८ हजार १०२ मत हयाः चुनाव त्याकूगु खः । थुगुखुसि नं एमालेपाखें हे टिकटय् दाबेदार जूगु खः । पार्टीं टिकट मबिइधुंकाः स्वतन्त्र उम्मेदवारी ब्यूम्ह रामवीर मानन्धरं मुक्कं १ हजार २१५ मत जक काःगु खः ।

अथेहे, जसपाया उम्मेदवार राजेन्द्र प्रसाद श्रेष्ठ २०७४ सालय् धाःसा समानुपातिकपाखें सांसद जूम्ह खः । थुगुखुसि प्रत्यक्षय् ल्वाःम्ह श्रेष्ठं नं जमानत बचेयाये मफुत । श्रेष्ठं २ हजार ४६१ मत काःगु खः ।

थुगु येँ ७ नम्बर क्षेत्रपाखें निर्वाचित राष्ट्रिय स्वतन्त्र पार्टीया गणेश पराजुलीं २४.२ अर्थात् ८ हजार ७४३ मत काःगु खः ।

थुगु क्षेत्रपाखें प्रतिनिधिसभा दुजलय् ३१ म्ह उम्मेदवार दूगु खः । निवर्तमान सांसदपिं श्रेष्ठ व मानन्धरलिसें २८ म्हेसिगु जमानत जफत जूगु दु ।

चुनाव त्याकूम्ह राष्ट्रिय स्वतन्त्र पार्टीया गणेश पराजुली, बूम्ह एमालेया श्यामकुमार घिमिरे व माओवादी केन्द्रया मानुषी यमि भट्टराई नं जक जमानत बचेयायेत ताःलाःगु दु ।

Categorized in राजनीति