zero media family planning adv

निर्भया सामूहिक बलात्कारय् दुथ्याःपिं प्यम्हेसित फाँसी

नेवा: अनलाइन न्युज | २०७६ चैत्र ७, शुक्रबार १०:१९:०४

अतिकं बय् बय् जूगु निर्भया सामूहिक बलात्कार काण्डया प्यम्ह दोषीपिन्त भारतय् फाँसी ब्यूगु दु ।

सामूहिक बलात्कारय् दुथ्याःपिं अक्षयकुमार सिंह, पवन गुप्ता, विनय शर्मा व मुकेश सिंहयात दिल्लीया तिहाड जेलय् थौं शुक्रवाः सुथय् ५ः३० ता इलय् फाँसी (मृत्युदण्ड) ब्यूगु खः ।

थ्वसिबें न्ह्यः अदालतं फाँसी बिइत ब्यूगु आदेशविरुद्ध छम्ह अभियुक्तं अनया सर्वोच्च अदालतय् अपिल याःगु खः । सर्वोच्चं आममाफी बिइमफइगु  फैसला यायेधुंकाः प्यम्हेसित मृत्युदण्ड ब्यूगु खः ।

छु खः निर्भया प्रकरण ?

निर्भया, पीडितया बास्तविक नां गोप्य तयेत संचारमाध्यमं तःगु नां खः । निर्भयायात राम सिंहं चलेयानाच्वंगु बसय् १६ डिसेम्बर २०१२ बहनी सामूहिक बलात्कार जूगु अदालतं ठहर याःगु दु ।

राम सिंहं २०१३ य् तिहाड जेलय् आत्महत्या यायेधुंकूगु दु । अदालतं दोषी ठहर याःपिं मध्ये छम्हेसित अपराध जूगु इलय् बालिग मजूगु धासें सुधार गृहय् छ्वःगु खः ।

६ म्हेसिगु आक्रमणय् लाःम्ह निर्भयाया २९ डिसेम्बर २०१२ स वासः यायेगु झ्वलय् सिंगापुरय् ज्यान वंगु ख: । मेडिकल साइन्स ब्वनाच्वंम्ह निर्भयायात जूगु अमानवीय घटना लिपा भारतय् थुकिया तच्वक. विरोध जूगु खः ।

थ्व घटना लिपा मिसा हिंसाविरुद्धया कानूनया समीक्षा यायेत व्यापक दबाब अप्वल । वधुंकाः भारतं जस्टिस वर्मा समिति नीस्वना उकिया सिफारिसया आधारय् २०१३ स बलात्कारथें जाःगु अपराधय् मृतयुदण्डया सजायया व्यवस्था याःगु खः ।

२०१३ य् हे घटनाया ६ म्ह दोषीपिन्त अदालतं दोषी ठहर याःगु खः । २०१४ स दिल्ली उच्च अदालत व २०१७ स सर्वोच्च अदालतं नं मृत्युदण्डया सजाययात निरन्तरता बिइगु फैसला याःगु खः । फाँसी मबिइत अभियुक्तं याःगु लिपांगु अपिलयात अदालतं खोज यायेधुंकाः मृत्युदण्ड ब्यूगु खः ।

थथे बलात्कारीपिन्त फाँसी बिइधुंकाः निर्भयाया छेँजःपिन्सं .न्याय कायेखन धकाः धाःगु दु ।

Categorized in दुर्घटना-अपराध