Header Nepal rastra bank Adv

निम्ह प्रमुखपिनिगु मंकाः ल्हाःतं किपू नगरपालिका १० वडा भवन उलेज्या

नेवा: अनलाइन न्युज – ललेन्द्र शाक्य | २०७८ माघ ५, बुधबार १५:०५:३०

किपू नगरपालिका १० वडा भवन किपू नगरपालिकाया प्रमुख रमेश महर्जन व काठमाडौं जिल्ला समन्वय समितिया प्रमुख शिवसुन्दर राजवैद्यया ल्हाःतं मंकाः कथं उलेज्या जूगु दु ।

उलेज्या ज्याझ्वलय् निम्ह मूपाहाँपिन्सं न्हूगु कलात्मक वडा भवनया लुखाय् रिबन चानादीगु खः उलेज्याय् नगरपालिका प्रमुख महर्जनं शिलापत्र उलाः दीगु खः । अथेहे, काठमाडौं जिल्ला समन्वय समितिया प्रमुख राजवैद्यं त्वाःदेवाय् मत च्याकादीगु खः ।

थौं ने.सं. ११४२ पोहेलागा दुतिया (माघ ५ गते) बुधवाः सुथय् किपूया १० वडा चिथु विहार परिसरया उगु कलात्मक वडा भवन उलेज्या जूगु खः ।

किपू नगरपालिका १० वडाया वडाध्यक्ष अमन महर्जनया सभानायःसुइ न्ह्याःगु वडा भवन उलेज्या ज्याझ्वलय् किपू नगरपालिकाया प्रमुख रमेश महर्जन व काठमाडौं जिल्ला समन्वय समितिया प्रमुख शिवसुन्दर राजवैद्य मूपाहाँ कथं झायादीगु खःसा नगरपालिकाया उप–प्रमुख लिसें प्रवक्ता सरस्वती रिजाल खड्का विशेष पाहाँ कथं उपस्थित जुयादीगु खः ।

अथेहे, ज्याझ्वलय् किपू नगरपालिका २ वडाया वडाध्यक्षलिसें किपू नगरपालिका सम्पदा, पर्यटन संस्कृति विभागया कजि रमेशमान डंगाल, ६ वडाया वडाध्यक्ष न्हुच्छेबहादुर महर्जनपिं पाहाँ कथं झायादीगु खः ।

उगु ज्याझ्वलय् किपू १० वडाया वडाया सकल वडा दुजःपिनिगु उपस्थिति दूगु खःसा थीथी वडाया वडा दुजःलिसें थीथी खलः पुचःया प्रतिनिधिपिनिगु नं उपस्थिति दूगु खः । अथेहे, ज्याझ्वः किपू १० वडा दुजः चिनिकाजी श्रेष्ठं न्ह्याकादीगु खः ।

उगु वडा भवन थ्यंमथ्यं स्वदँया ई बिकाः निर्माण ज्या क्वचायेकूगु खँया जानकारी बिसें वडाध्यक्ष अमन महर्जनं ०७५/०७६ सालपाखे उपभोक्ता समितिपाखें मुक्कं इस्टिमेट ५० लखया याःगु खःसा १८,७७,०००/– तका दां उपभोक्ता समितियात भुक्तानी यानागु खँया जानकारी बियादिल ।

अथेहे, ०७७/०७८ पाखे ९६,९६,७०७/– तका टेण्डरपाखें इस्टिमेट याःगु खःसा ५९,७०,७४४/– तका कबूल जूगु खः धकाः वडाध्यक्ष महर्जनं जानकारी बिसें आः वडा भवन तयारी अवस्थाय् निर्माण ज्या क्वचाःगु जानकारी बियादीगु खः ।

काठमाडौं जिल्ला समन्वय समितिया आर्थिक ग्वाहालिं निर्माण जूगु किपू १० वडाया कलात्मक भवन पुलांगु चिथुविहार गाउँ पंचायतया भवन थुनाः परम्परागत नेवाः वास्तुकला शैलीं निर्माण जूगु वडा भवन खः । थुगु भवन नापं स्वाःगु ऐतिहासिक गणेद्यः फल्चा नं दुसा उगु हे वडा भवन दुने किपूया सक्रिय क्लब सनस्टार क्लबया ज्याकुथि नं दु । उगु सनस्टार क्लबया न्ह्यलुवाय् आः उगु हे वडा भवन स्वाःगु फल्चाय् किपुली न्हनेधुंकूगु हाथु हायेकेगु परम्परायात निरन्तरता बिइगु पलाः न्ह्याकाः वयाच्वंगु दु । थ्व ल्याखं नं उगु कलात्मक वडा भवनया महिमा व महत्व अप्वःगु दु ।

किपाः ज्ञानकुमार महर्जन

Categorized in स्थानिय-समाज