coved ad

निम्हतिपु सुमित्रा व बीरेन्द्र महर्जनया न्हूगु म्ये पिदन

नेवा: अनलाइन न्युज – ललेन्द्र शाक्य | २०७८ मङ्सिर १२, आइतबार १०:२२:१८

नेपालभाषा संगीत ख्यलय् निम्हतिपुया रुपय् खनेदया वःपिं सुमित्रा व बीरेन्द्र महर्जनया सलं थ्वःगु ज्वःम्ये  ‘स्वरे छंगु मतिनां स्वत्तुमतु स्वगु नुगः...’ बोलया म्येया म्युजिक भिडयो शनिवाः छगू ज्याझ्वःया दथुइ पितब्वज्या जुउगु दु ।  

वय्कःपिं निम्हतिपुया थ्वसिबें न्हापा थगुने  ‘जुल रे जुल...’ बोलया ज्वःम्ये पिदने धुंकुगु खःसा थुगुसिइ ‘स्वरे छंगु मतिनां स्वत्तुमतु स्वगु नुगः...’ बोलया म्येया म्युजिक भिडयो पिदंगु खः ।

उगु म्युजिक भिडियो पितब्वज्या ज्याझवलय् कलानिधि संगीत महाविद्यालयया कजि धनबहादुर गोपाली मूपाहाँ कथं झायादीगु खः ।

म्येहालामि सुमित्रा महर्जनया मां–अबु बसुदेवी व बेखानारायण महर्जनया सभानायःसुइ न्ह्याःगु म्युजिक भिडयो पितब्वज्या ज्याझ्वलय् नेपालभाषाया म्युजिक भिडयोया न्हापांम्ह निर्देशक नांजाःम्ह बरिष्ठ सिने पत्रकार विजयरत्न असंबरे व नांजाःम्ह म्येहालामि संगीता शाक्य विशेष पाहाँ कथं झायादीगु खः । म्युजिक भिडियो पितब्वज्याय् भिडियोया निर्माता ओमप्रकाश महर्जनं लसकुस यानादीगु खःसा म्येहालामि सुमित्रा महर्जनं सुभाय् देछाना दीगु खः ।

म्ये संकिपाकःमि सुरेन्द्र तुलाधरं च्वयादीगु अले नांजाःम्ह संगीतकःमि सुरेन्द्र श्रेष्ठं लसय् हनादीगु खःसा  थ्व म्येया भिडियो पटाचारा, कृषा गौतमी व कर्म संकिपाया निर्देशक रामकृष्ण खडगीया निर्देशनय् तयार जुउगु खः ।

उगु भिडियोया किपालुमि रकि महर्जन, छ्याय्फ्वायकःमि बालकृष्ण बंशी खःसा थुके सरिता बज्राचार्य, किरण जोशी व निभा डंगोलं अभिनय यानादीगु दु ।

Categorized in कला