zero media family planning adv

निब्व बहुमत दुगु सरकारयात वाराक्वारा संकुगु न्हिं – असार ४

नेवा: अनलाइन न्युज | २०७७ आषाढ ३, बुधबार २२:०९:०७

निश्चल

नेवाःतय्गु साँस्कृतिक जीवनया आधार  धइगु हे गुथि व्यवस्था खः । थुकी जुइगु गुगु नं कथंया प्रहार नेवाःतय्गु नितिं सह्य  जुइफइमखु । थ्व हे खँया अभिव्यक्ति खः २०७६ असार ४ गते फिब्व ख्यःया माइतीघर मण्डलाय् खनेदुगु अपार व अभूतपूर्व जनप्रदर्शन । थुकिं नेपालय् शासन यानाच्वंगु स्वब्वय् निब्व बहुमत दुगु सरकारयात वाराक्वारा संकाबिल । अले वयांलिउ हे राष्ट्रिय सभाय् पेश जुयाच्वंगु गुथि विधेयक २०७५ लित कायेत वाध्य जुल । खतुं थुगु अपार जनप्रदर्शनया भान दयेवं हे सरकारं विधेयक लित कायेगु घोषणा याःगु खः धाःसा औपचारिक रूपं लित कायेगु ज्या धाःसा असार १० गते वयाः तिनि याःगु खः । 

तर गुथि विधेयकया थुगु प्रकरण सिधःगु मदुनि । सरकारं भूमि सम्बन्धी ऐनय् थुकियात दुथ्याकाः हयेगु कुतः यानाच्वंगु दु । अले लकडाउनया इलय् वयाः थ्व सम्बन्धय् अध्ययन यायेत सांसद जीवनराम श्रेष्ठया संयोजक तोके यानाबिइगु ज्या नं याःगु दु । थ्व नितां ज्याय् सरकारया कपटी व्यवहार सीदु । उकिं गुथि विधेयकया विरोधी आन्दोलन क्वचाःगु मदुनि । 

गुथिया सम्बन्धय् न्हापा लालमोहर, सनद, रुक्का, शिलापत्र, ताम्रपत्र इत्यादि प्रमाणत फुक्क प्रमाण लगे मजुइक खारेज जुइगु अले दयाच्वंपिं गुथियारतय्गु हक नं मदइगु व्यवस्था हे थुकिया खतरनाक खँ खः । थुगु विधेयकं ऐनया रूप कायेवं आः दयाच्वंगु गुथि संस्थान नं खारेज जुयाः फुक्क अधिकार राष्ट्रिय गुथि प्राधिकरणय् वनी । क, ख वर्गया मुख्य मुख्य व ततःधंगु आम्दानी दुगु गुथि फुक्क प्राधिकरणया ल्हाःतय् जुइ । उकिया जग्गाजमिन लिजय् बीफइ । गाक्क गाक्क आम्दानी मदुगु गुथित धाःसा गुथिया नामय् मखु, धार्मिकस्थल व्यवस्थापन समिति धकाः नीस्वनाः चले याइ । थ्व धार्मिक स्थल व्यवस्थापन समितियात स्वीकृति बीगु व नियमन यायेगु ज्याया नितिं प्रदेशस्तरय् प्रदेश गुथि व्यवस्थापन समिति धइगु दइ । फुक्क गुथियात सरकारी वा राजगुथिइ यंकेगु व थ्व सरकारी अधिकारयात छ्यलाः गुथिया थासय् धार्मिक स्थल व्यवस्थापन समिति चायेकाः गुथि धइगु हे न्हंकाछ्वयेगु ज्या थुकिं याइ । थ्व थुलि खतरनाक विधेयक खः । थुकिं गुथि धइगु हे राजगुथि व सार्वजनिक गुथि खः धइगु अवधारण कुबियाः निजी गुथि न्हंकाछ्वयेगु ताः तःगु खनेदु । 

गुथि धाल धायेवं झीसं परम्परागत रूपं छुं ज्याखँ न्ह्याकेत दयेकातःगु संगठन धकाः थू । नेवाःतसें थःपिनि गुथि व्यवस्थायात कयाः हे यक्व न्ह्यः हे संगठन यायेसःपिं धकाः गर्व यायेगु यानावयाच्वंगु नं दु । तर पिनें वयाः सत्ताय् थ्यंपिं मनूतय्गु मिखाय् धाःसा गुथि धइगु द्यःतय् नामय् फ्यानातःगु जग्गा खः धइगु लानाच्वन । गुथि संस्थानयात भूमि सुधार मन्त्रालय अन्तर्गत तयातःगु व आः नं गुथि विधेयक भूमि व्यवस्था मन्त्रालयं हःगु व हानं गुथि विधेयक धाल धायेवं मनूतय् तं पिहाँ वइ धकाः भूमिसम्बन्धी ऐनय् गाभे यायेत्यंगु खँ स्वयेबलय् इमिगु नजर व अवधारणा हिउगु मदुनि धइगु खँ खनेदु । मिखा हे जग्गाय् लानाच्वंगु जूगुलिं इमिगु नजर हिलीगु नं खनेमदु । 

नेवाःतय्सं गुथि विधेयकया विरोध यायेवं दांगय् गंगा चौधरीपिसं विरोध याःगु जक मखु, थ्व विधेयक पास याना तुं त्वःते धकाः हालाजूगु खँ नं थुथाय् लुमंके बहः जू । दांगय् भूमि अधिकार समिति न्हापा हे चायेकाः गतिविधि यानाच्वने धुंकूगु नं जुयाच्वन । विशेष यानाः स्वर्गद्वारीया नामय् दुगु सलंसःपी जग्गाय् म्हय्तय्त छुं भचा हिस्सा बियाः चले यायेगु तःधंगु चाल दुगु धइगु खँ नं पिहाँ वयाच्वंगु दु । अथे जुयाः गुथि विधेयकय् पंगः दनेवं इपिं हिगःमिगः चायाः गुथि व्यवस्थायात हे सामन्ती व्यवस्था धकाः धाःगु झीसं ताःगु हे खँ खः । 

गुथिया सम्बन्धय् नेपाःया संविधानया धारा २९० स किसानतय्गु नापं खँ न्ह्यथनाः कानुन दयेकेगु धकाः धयातःगु स्वयेबलय् गुथिया विधेयक दयेकीगु नितिं संविधान दयेकेसिकं न्ह्यः हे गिरोह सक्रिय जूगु व व हे गिरोहपाखें संविधानय् उगु खँ तयेकूगु जुइफुगु नं अनुमान जू । उकिं थुगु विधेयक सरकारया ज्या मखु, सरकारयात मोहरा दयेकाः लिउने भूमाफियाया गिरोह नं सक्रिय जुयाच्वंगु खँ थुइकेत थाकु मजू । गुथि विधेयकया विरोधय् थुज्वःगु गिरोहया नं भण्डाफोर जुइमाःगु दु । 

गुथि विधेयक विरोधी आन्दोलनय् समग्र नेवाः ख्यः हे आन्दोलित जुल । भाषाजाति आन्दोलनय् सक्रिया जुयाच्वंपिं व मजूपिं नं उत्तिकं कुहाँ वल । गुलिगुलिसिनं थुकियात गुथ्याःतसें याःगु आन्दोनल धकाः धाःसां वास्तवय् थ्व नेवाः अस्तित्व नाप स्वानाच्वंगु नेवाः आन्दोलन हे खः । सरकारं विधेयक लित कायेधुंकाः धाःसा थ्व आन्दोलनय् छगूकथं नेवाःतय्गु दथुइ हे लित कयां मगाः खारेज हे यायेमाः धाइपिं व विधेयक धासेंलि लित काइगु ला खःनि धाइपिं दयाः विभाजन नं खनेदत । सरकारयाके न्ह्यागु नं इलय् न्ह्यागु नं विधेयक हयेगु अधिकार  ला दयाच्वनीगु हे जुल । सांसदतय्सं नं गैर सरकारी विधेयक धकाः संसदय् विधेयक पेश यायेफइगु हे जुल । अथे जूगुलिं विधेयक लित कायेवं तुं मामला सिधइगु नं मखु, गुगुं विषयस जिमिसं भविष्यय् विधेयक हये हे मखु धकाः सरकारं सम्झौता याइगु नं मखु, उकिं थुकिया विषययात दरकिनार मजूतले झी संघर्षरत जुइमाःगु हे जुल । छुं जुयाः विरोध याकयाक नेवाः विरोधी प्रावधान दुथ्यात धाःसा उकिया खिलाफ नं संघर्ष यानाः खारेज याकेत संघर्ष यायेमालीगु जुल । उकिं थुकथं आन्दोलनय् वःगु विभाजन धइगु नं तत्कालीक खँ जक खः । 

भूमि सम्बन्धी ऐन हयेगु सवालया सिलसिलाय् भूमि व्यवस्था मन्त्री पद्मा अर्यालं गुथि संस्थानं कःघानाच्वंगु गुथिया सम्बन्धय् छिकपिसं मिखा तयादीमते, नेवाःतय्गु मेगु निजी गुथिइ जिमिसं मिखा तयेमखु धकाः कित्ताकाट सम्झौताया खँ ल्हाना हल । तर गुथि संस्थानं न्ह्याकावयाच्वंगु आपालं जात्रापर्व नेवाः संस्कृतिलिसे स्वानाच्वंगु दु । थुकियात मुक्कं सरकारया प्राधिकरणया ल्हाःतय् त्वःताबिल धाःसा नेवाः संस्कृति कन्हय् वनाः न्हनावनी । थ्व खँ नं नेवाः सरोकारया खँ खः । थुकिया नितिं हे थुज्वःगु गुथि फुक्क नेवाःतय्गु ल्हाःतय् हे वयेमाल, गुथि संस्थान खारेज यायेमाल धकाः थ्व खँ नं नेवाः सरोकारया खँ खः । थुकिया नितिं हे थुज्वःगु गुथि फुक्क नेवाःतय्गु ल्हाःतय् हे वयेमाल, गुथि संस्थान खारेज यायेमाल धकाः २०६५ सालं नेवाःतय्सं साँस्कृति आन्दोलन याःगु खः । 

२०६५  सालया नेवाः साँस्कृतिक आन्दोलनं गुथि संस्थान खारेज यायेगु माग तल । सरकारं सम्झौताकथं गुथि संस्थानया औचित्यया सम्बन्धय् अध्ययन यायेत उच्चस्तरीय कार्यदल दयेकल । थुगु कार्यदलं नेवाः गुथि प्राधिकरण चायेकाः नेवाःतय्गु जात्रापर्व संस्कृति न्ह्याकेमाः धइगू प्रतिवेदन लःल्हात । तर गुथियात नेवाः  गुथि प्राधिकरणया ल्हाःतय् लःल्हायेगुया अःखः सरकारं जनकरण यायेगु पलेसा सरकारी केन्द्रीयकरण यायेगु व उकिया लःवः व्यक्तिगत रूपं नं कायेगु कथं थुगु गुथि विधेयक हल । थ्व वास्तवय् छगू षडयन्त्र हे खः । थुगु षडयन्त्रयात चकनाचूर यायेमाःगु भाला आः नेवाःतय्त वयाच्वंगु दु । मखुसा कन्हय् नेवाः अस्तित्व नापं न्हनावनीगु खतरा ब्वलंगु दु । 

 

Categorized in बिचा: