nepal life 2076 3 18

निदँया नितिं मेस्सी पीएसजीइ अनुबन्ध

नेवा: अनलाइन न्युज – ललेन्द्र शाक्य | २०७८ श्रावण २७, बुधबार १४:०४:५२

अर्जेन्टिनी फुटबल टिमया कप्तान व सुपरस्टार लिओनल मेस्सी फ्रेन्च क्लब पेरिस सेन्ट जर्मेन (पीएसजी)इ अबन्धित जूगु दु ।

मेस्सीं मंगलवाः फ्रेन्च लिग वान क्लब पीएसजीलिसे निदँया नितिं सम्झौता याःगु खः । स्पानिस क्लब बार्सिलोना त्वःतूगु निन्हु लिपा हे फ्रेन्च क्लबं ३४ दँया मेस्सीयात पेरिसय् दुकाःसें निदँया नितिं अनुबन्ध याःगु खः ।

अथेहे, मेस्सीया नितिं स्वंगूगु दँ नं पेरिसय् हे च्वनेगु विकल्प खुल्ला याःगु दु । पीएसजीं मेस्सीयात फ्रि एजेन्टया रुपं अनुबन्ध याःगु खः ।

पीएसजी युरोपियन च्याम्पियन्स लिग त्याकेगु महत्वकांक्षाया लिसें लिपांगु दँ स्टार कासामिपिं अनुबन्ध यानाच्वंगु दु । ला लिगाया आर्थिक नियम बाधक जूबलय् मेस्सीं निन्हु न्ह्यः जक थःगु यःगु क्लब बार्सिलोना त्वःतेमाःगु खः ।

खुक्वःया बालोन डे ओर अवार्ड विजेतायात अनुबन्ध यायेधुंकाः पीएसजीइ आः मेस्सीलिसें नेमार व किलिएन एमबाप्पेया अट्याकिङ लाइन जुइ ।

थ्वसिबें न्ह्यः हे पीएसजीं अच्रफ हाकिमीयात इन्टरपाखें अनुबन्ध याःगु खःसा सर्जियो रामोस, जर्जिनिओ विजनाल्डम व जियानुलुजी डोनारुम्बायात फ्रि एजेन्टया रुपं अनुबन्ध याःगु खः ।

बार्सिलोनाय् निगू दशकसिबें अप्वः ई बियाः पीएसजी थ्यंकूम्ह मेस्सीं न्हूगु क्लबय् करियर सुरु यायेत थः आतुर जूगु धाःगु दु ।

मेस्सीं सम्झौतालिपा धाःगु दु, ‘पेरिसय् जिगु करियरया न्हूगु अध्याय सुरु यायेत जि उत्साहित जुयागु दु । थुगु क्लबया म्हगस जिगु महत्वाकांक्षालिसें मिले जूगु कथंया दु ।’

मेस्सीं पीएसजीया कासामि व स्टाफया क्षमताया बारे थः जनकारी जूगु नं धाःगु दु । मेस्सीं ‘जि इपिंलिसे मिलेजुयाः क्लबय् बांलाकेत प्रतिवद्ध दु’ धासें थः पार्क डे प्रिन्सया पिचय् वनेत तकं आतुर जूगु धाःगु दु ।

अथेहे, पीएसजीया नायः नासेर अल खेलैफीं मेस्सीयात थःपिन्थाय् दुकाये खनाः अतिकं लसता पिज्वःगु धाःगु दु । नासेरं धाःगु दु, ‘लिओनल मेस्सीं पीएसजीयात छनोट याःगुलिं जि लयेताःगु दु व वयात पेरिसय् जिमिगु छेँजः दुने लसकुस यायेखनाः जिपिं गौरवान्वित जुयागु दु ।’

मेस्सीं पीएसजीइ ३० नम्बरया जर्सी फिइगु जूगु दु ।

मेस्सी १३ दँया उमेरय् हे सन् २००० स बार्सिलोनाय् आबद्ध जूगु खः । वं ला मासियाया युथ एकेदेमि जुयाः २००३ स सिनियर टिमय् डेब्यु याःगु खः । मेस्सीं क्याटलान क्लबया नितिं ७७८ कासाय् ६७२ गोल याःगु दु । मेस्सी बार्सिलोना व ला लिगाया कीर्तिमानी गोलकर्ता तकं खः । खुक्वःतक बालोन डे ओर अवार्ड विजेता मेस्सीं बार्सिलोनाय् १० ला लिगा व ४ च्याम्पियन्स लिगलिसें मुक्कं ३५ गू उपाधि त्याकूगु दु ।

Categorized in कासा