zero media family planning adv

निःशुल्क मिखा जाँच शिविरय् मिखादान व छ्यंगु दान नं जुल

नेवा: अनलाइन न्युज – विजयरत्न | २०७७ चैत्र २३, सोमबार १०:५५:२०

युवक बौद्ध मण्डल नेपालया ग्वसालय् ग्वसाः खलःया भवन परिसरय्    शनिबार छगू निशुल्क मिखा जाँच शिविर जुउगु दु । आँखा अस्पतालया प्राविधिकपिनिगु ग्वाहालिइ जुउगु उगु शिविरय्   अनुभवी चिकित्सकपिन्सं मुक्कं २८७ म्हेसियागु मिखा जाँच याःगु खःसा उकीमध्ये  मोतिबिन्दु खनेदुपिं १० म्हेसिगु शल्यक्रिया आँखा अस्पताल त्रिपुरेश्वरय् याइगु खँ ग्वसाःखलःया स्वास्थ्य उप समितिया कजि हेमरत्न बज्राचार्यं जानकारी बियादीगु दु ।

समाजसेवी मोतिशान्ति शाक्यया संयोजकत्वय् जुगु मिखा जाँच शिविरपाखें मिखाया उपचार याकुगुपिंन्सं थ्व शिविरयात छगू च्वछायेबहःगु शिविर धकाः धाःगु दु ।

ग्वसाःखलःया नायः अरणीतारा बज्राचार्यं थुगु संस्थापाखें स्थानिय, राष्ट्रिय व अन्तरराष्ट्रिय, धार्मिक, सामाजिक, शैक्षिक, स्वास्थ्य व सेवामूलक ज्याझ्वः जुयाच्वंगु खँ नं धयादिलसा उगु निःशुल्क मिखा शिविर ताःलाकेत ग्वाहालि याःपिं वरिष्ठ चिकित्सकपिं लिसेलिसें सकलसित सुभाय् नं देछाना दिल ।

उगु शिविरय् इच्छुक मनूतसें मरणोपरान्त मिखादान व छ्यंगु दान नं याःगु खः । थथे दानया संयोजन नेपाल आई डोनेशन सोसाइटी व नेपाल बर्न फाउण्डेशनपाखें जुउगु खँ नं ग्वसाःखलःपाखें जानकारी बिउगु दु।

Categorized in स्थानिय-समाज