2565 buddha Jayanti ADV

नासाया शुक्र ग्रहय् निगः अन्तरिक्ष मिसन छ्वयेगु घोषणा

नेवा: अनलाइन न्युज – ललेन्द्र शाक्य | २०७८ जेठ २०, बिहिबार ११:००:४६

सौर्यमण्डलया दकले क्वाःगु ग्रह कथं कयातःगु शुक्र ग्रहय् अमेरिकी अन्तरिक्ष संस्था नासां निगः मिसन संचालन यायेगु घोषणा याःगु दु ।

सन् २०२८ व २०३० या दथुइ उगु मिसन संचालन यायेगु नासाया योजना दु ।

न्हापांगु मिसनया नां ‘डाभिन्सी प्लस’ व निगूगु मिसनयात ‘भेरिटास’ नां ब्यूगु दु । उगु निगुलिं मिसनया नितिं ५०÷५० करोड डलर बजेट फ्याःगु नासां जानकारी ब्यूगु दु ।

पृथ्वीया लिक्कया ग्रह छाय् थुलि क्वाःगु खः धैगु खँ लुइकेत अन्तरिक्ष मिसन संचालन यायेत्यंगु नासाया प्रशासक बिल नेल्सनं धाःगु दु । नेल्सनं धाःगु दु, ‘थ्व मिसनपाखें शुक्र ग्रह खाः न्हायकं तकं नायाः वनीगु कथं छाय् क्वात धैगु सिइकेगु व थुइकेगु नितिं ज्या याइ ।’

शुक्र ग्रहया सतहया तापक्रम ५०० डिग्री सेल्सियस जूगु वैज्ञानिकपिन्सं धाःगु दु ।

Categorized in अन्तर्राष्ट्रिय