prabhu baink new

नारायणकाजी व बामदेवयात उपप्रधानमन्त्री यायेगु प्रम ओलीया तयारी

नेवा: अनलाइन न्युज – ललेन्द्र शाक्य | २०७७ भाद्र १, सोमबार १०:५२:३७

नेपाल कम्युनिष्ट पार्टीया नायः तकं जुयाच्वंम्ह प्रधानमन्त्री केपी शर्मा ओलीं म्हिगः आइतवाः न्वकू बामदेव गौतमयात बालुवाटारय् सःताः सहलह याःगु दु । वं गौतमयात सरकारय् च्वनाः ज्या यायेत आग्रह याःगु सीदूगु दु ।

पार्टी व सरकारय् मिलेजुयाः ज्या यायेत ओलीं धायेधुंकाः बामदेवं थः कठिन जिम्मेवारी कःघायेत तयार दूगु धाःगु खः । गौतमयात उपप्रधानमन्त्रीलिसें महत्वं जाःगु मन्त्रालयं बिइगु ओलीया प्रस्ताव खः । तर, चुनाव बूम्ह मनू जूगुलिं कानूनी अड्चन दूगु विषय नं ब्वलंगु खः ।

गौतमयात राष्ट्रियसभाय् मनोनित यानाः हयेबलय् सरकारय् जिम्मेवारी बिइ मिलेजूगु वा मिलेमजूगु बारे तकं सहलह जूगु खः । उकिया नितिं ओलीं कानून व्यवसायीलिसे परामर्श न्ह्याकीगु जूगु दु ।

संविधानय् चुनाव बूम्ह मनू सरकारय् वने मफइगु व्यवस्था दु । प्रधानमन्त्री वा मन्त्री जुइ मदइगु व्यवस्था दूगुलिं गौतमयात राष्ट्रियसभा सांसद दयेकाः यंके ज्यू वा मज्यू धैगु विषयस राय सुझाब काइगु जूगु दु । थःत अतिकं मछिंगु इलय् गौतमं साथ ब्यूगुलिं ओलीं थुगुखुसि गुण पुलेगु धाःगु दु ।

अथेहे, प्रधानमन्त्री ओलीं सचिवालय दुजः नारायणकाजी श्रेष्ठयात नं उपप्रधानमन्त्रीलिसें महत्वं जाःगु जिम्मेवारी बिइगु नुगःखँ प्वंकूगु दु ।

श्रेष्ठ नं प्रतिनिधिसभा चुनावय् गोरखां पराजित जूम्ह खः । श्रेष्ठ लिपा राष्ट्यिसभा दुजलय् निर्वाचित जूगु खः ।

श्रेष्ठया हकय् नं बामदेवयात थें लागू जुइ । संविधानं वयात नं मन्त्री जुइगुपाखें पनेगु अवस्था जुइफु । तर, कानूनं ब्याख्या व संवैधानिक व्यवस्थाबारे परामर्श यानाः प्रधानमन्त्री ओली न्ह्यःने वनेगु तयारी अवस्थाय् दु ।

Categorized in राजनीति