2565 buddha Jayanti ADV

नाफाखोर निगम : महामारीइ घाटा क्यनाः इन्धनया मूल्यबृद्धि

नेवा: अनलाइन न्युज – ललेन्द्र शाक्य | २०७८ जेठ ५, बुधबार १२:१६:३९

नेपाल आयल निगमं शुक्रवाः डिजेल, मचिकं व पेट्रोलय् नितका नितका दां थकाल । महामारीया हे दथुइ विज्ञप्ति सार्वनिक यासें निगमं धाःगु दु, ‘मूल्य समायोजनलिपा...सामान्य बिक्रीया अवस्थाय् पाक्षिक रुपं निगमयात ११० करोड घाटा जुइगु खनेदु ।’

बास्तविक धाःसा १५ न्हुया दुने थुलिमछि घाटा जुइगु अवस्था मदु । कोरोना महामारीया हुनिं आः निगमया विक्री सामान्य अवस्थाया थें मदु । महामारीइ नं माग म्हो जक क्वाहाँ वंगुलिं एलपीजी ग्यासया धाःसा १५ न्हुया दुने थ्यंमथ्यं ५४ करोड घाटा जुइगु खनेदु ।

निगमया कथं आः पेट्रोलय् प्रतिलिटर ८.५६ तका, डिजेलय् प्रतिलिटर ४.४६ व ग्यासय् प्रतिसिलिण्डर ३७५.१३ तका दां घाटा जुयाच्वंगु दु । तर, महामारी नियन्त्रण यायेत थीथी जिल्लाय् जारी निषेधाज्ञाया हुनिं पेट्रोलियम पदार्थ चिकंया माग खुम्चेजूगु दु । निगमं पुलांगु हे माग व आपूर्तिया आधारय् हिसाब यानाः आपालं घाटा जुइगु क्यंगु दु । निगमया प्रवक्ता विनीतमणि उपाध्यायया कथं आः डिजेलया विक्री ५० प्रतिशत क्वाहाँ वःगु दु । निषेधाज्ञा न्ह्यः न्हिथं ७ हजार किलोलिटरसिबें अप्वः विक्री जुइगु डिजेल आः ४ हजारनिसें ४२ सय किलोलिटरतक क्वाहाँ वःगु उपाध्यायं धाःगु दु ।

अथेहे, पेट्रोलया बिक्री नं ५० निसें ६० प्रतिशत म्हो जूगु दु । सामान्य अवस्थाय् २५ सय किलोलिटरतक बिक्री जुइगु पेट्रोल आः १०० निसें १२०० किलोलिटर बिक्री जुयाच्वंगु दु । 

१६ बैशाखय् निषेधाज्ञा लागू जुइधुंकाः निगमं १९ गते विज्ञप्ति सार्वजनिक यानाः ‘१०० करोड घाटा जुइगु अवस्था दुसां नं नागरिक हितया नितिं मूल्य समायोजन मयायेगु’ धाःगु खः ।

निगमया कथं, उगु इलय् पेट्रोलय् प्रतिलिटर ८.७६ तका, डिजेलय् प्रतिलिटर ३.४२ व ग्यासय् प्रतिसिलिण्डर ३७५.१३ तका घाटा जुयाच्वंगु खः । जबकि, डिजेल व पेट्रोलया माग म्हो जुइधुंकूगुलिं उगु ई नं निगमयात १५ न्हुया दुने १०० करोड घाटा जुइगु अवस्था मदुगु खः ।

निषेधाज्ञा सुरु जुइन्ह्यः भाः थकाःबलय् सार्वजनिक याःगु विज्ञप्तिं नं निगमया ‘डाटा मेनुपुलेसन’यात पुष्टि याइ । बैशाख २ गते निगमं मू थकाःसें पाक्षिक घाटा ७० करोड ६६ लख जूगु धाःगु खः । उगु इलय् निगमं पेट्रोलय् प्रतिलिटर ६.७२ तका, डिजेलय् प्रतिलिटर ०.४४ व ग्यासय् प्रतिसिलिण्डर ४१८.१३ तका दां घाटा जूगु धाःगु खः ।

उगु इलय् निगमं सामान्य बिक्रीया अवस्थाय् भयावह घाटा जुइगु धासें मू थकाःगु खः । निगमया प्रवक्ता उपाध्यायं धाःगु दु, ‘सामान्य अवस्थाय् ११० करोड घाटा जुइ धयागु खः, आः चिकं बिक्री म्हो जूगु कथं हे प्रक्षेपित घाटाया मात्रा नं क्वाहाँ वनी ।’

निषेधाज्ञा गुबलेंनिसें चाली धैगु अनुमान यायेमफइगु जूगुलिं सामान्य अवस्थाया बिक्रीया हे हिसाब यानाः घाटा प्रक्षेपण याःगु उपाध्यायं धाःगु दु ।

निगमं पेट्रोलियम पदार्थय् जूगु घाटा पूर्ति धाःसा मू स्थिरीकरण कोषपाखें यानाः वयाच्वंगु दु । थ्व कोषय् उपभोक्तापखें असुल याःगु शुल्क हे मुनाच्वंगु दु ।

लकडाउनया ई

निगमं थुगुखुसि निषेधाज्ञाय् पेट्रोलियम पदार्थया भां थकाल । वंगु दँया लकडाउनय् धाःसा नियमित मू समायोजन तकं मयात । कारण खः, विश्वबजारय् चिकंया मू आःतकया हे म्हो बिन्दुइ क्वाहाँ वःगु । विश्वबजारय् चिकंया भाः आपालं क्वाहाँ वःसां नं नेपालय् क्वाहाँ मवयेधुंकाः आयल निगमया ‘बनियागिरी’यात न्ह्यसः चिं थंगु खः ।

२०७७ बैशाख लिपांगु वाः अन्तर्वार्ताय् नेपाल आयल निगमया कार्यकारी निर्देशक सुरेन्द्र पौडेलं धाःगु खः, ‘लकडाउनय् मू क्वकायेबलय् जनतायात फाइदा जुइमखु, थुज्वःगु अवस्थाय् सुयागु नितिं मू क्वकायेगु ?’

लकडाउनया इलय् निगमयात लिटरय् पेट्रोलय् प्रतिलिटर २२.४५ तका, डिजेलय् २५.६९ तका व मचिकनय् ५५.३५ तकातक नाफा जूगु खः । निगम वहे इलय् थ्यंमथ्यं ३ अर्ब नाफा कमेयाःगु खः ।

विश्वबजारय् मद्दिक्क मू क्वाहाँ वःसां नं निगमं नेपालय् खपत म्हो जूगु कूतर्क तसें स्वचालित मू प्रणाली कथं मू समायोजन याःगु मदु । निगमं मू समायोजन जुइमाःगु मागयात मुक्कं बेवास्ता याःगु खः ।

विश्वबजारय् चिकंया भाः अप्वयाः वंबलय् निगमं वहेकथं मू थकयाः यंकल । उकिया हे आधारय् निगमं वंगु दँ १२ अर्ब ९१ करोड ४८ लाख खुद नाफा कमेयात । कर्मचारीया नितिं १७ करोड ४२ लाख बोनस नं भाग तल । आः निगमया खाताय् थ्यंमथ्यं ३ अर्ब ४७ करोड ३२ लाख तका दां बोनस रकम मुनाच्वंगु दु ।

निगमं चालू आर्थिक दँया ११ महिना दुने १४ क्वः मू समायोजन याःगुलि १२ क्वः भाः थकाल धाःसा स्वक्वः स्थिर जुल ।

Categorized in बजाः