nepal investment baink

नागरिकता विधेयक बहुमतं पास

नेवा: अनलाइन न्युज – ललेन्द्र शाक्य | २०७७ आषाढ ७, आइतबार १९:२८:१४

न्हय्दँ लिपा जक अंगीकृत नागरिकता बिइगु बहुमतया निर्णय, कांग्रेस व जसपाया फरक मत

प्रतिनिधिसभाया राज्य व्यवस्था व सुशासन समितिं नेपाली मिजंलिसे ब्याहा याइम्ह विदेशी मिसायात न्हय्दँ लिपा जक अंगीकृत नागरिकता बिइगु व्यवस्था लिसें नागरिक विधेयक बहुमतं पास याःगु दु ।

समितिया थौं आइतवाः च्वंगु बैठकं निदँ न्ह्यःनिसें थानाच्वंगु नागरिकता विधेयक क्वचायेकूगु खः । समितिं नेपाली मिजंलिसे ब्याहा याइम्ह विदेशी मिसां अंगीकृत नागरिकता काये चाहेजूसां वैवाहिक स्वापू कायम जुयाः नेपालय् निरन्तरं न्हय्दं स्थायी बसोबास याःगु जुइमाःगु व्यवस्था थप याःगु दु ।

न्हय्दँ स्थायी बसोबास याःगु वडा ज्याकुथिं सिफारिस याःगु जुइमाःसा विदेशी नागरिकता वा व सरहया राष्ट्रियता क्यनीगु दसिपौ मकाःगु जूसा उकिया दसि वा काःगु जूसा परित्यागया नितिं कारवाही चलेयाःगु दसि नं पेस यायेमाः ।

नगरिकता कायेमखंतलेया नितिं आर्थिक, सामाजिक व सांस्कृतिक अधिकार उपभोग यायेत स्थायी आवासीय अनुमति पौ बिइ । उगु अनुमति पौया आधारय् चलअचल सम्बन्धी आर्जन यायेत, भोग यायेत, बेचबिखत यायेत, व्यवसायिक लाभ कायेत व मेमेगु कारोवार याये खनी ।

अथेहे पेशा व व्यवसाय संचालन यायेत, उद्योग, ब्यापार व व्यवसाय संचालन यायेफइ । अथेहे, जन्म, मृत्यु, ब्याहा, सम्बन्ध बिच्छेद, बसाई सराईथें जाःगु व्यक्तिगत घटना दर्ता व राष्ट्रिय म्हसीका पौ तकं कायेफइ । अंगीकृत नागरिकता कायेधुंकाः स्थायी आवासीय अनुमति पौ स्वतः खारेज जुइ ।

कांग्रेस व जसपाया फरक मत

समितिया निर्णयस प्रमुख विपक्षी नेपाली कांग्रेस व जनता समाजवादी पार्टी (राजपा व समाजवादीं) फरक मत तःगु दु ।

इमिसं आःथें ब्याहा यानाः वयेधुंकाः अंगीकृत नागरिकता कायेदइगु व्यवस्था जुइमाःगु मत तःगु दु । समितिं बहुमतं पास याःगु प्रस्ताव संविधानया मर्म अःखः जूगु निगुलिं दलया सांसदपिन्सं धाःगु दु ।

अथेहे, सांसद वृजेशकुमार गुप्तां नं समितिया निर्णयस थःपिनिगु फरक मत तःगु दु ।

Categorized in राजनीति