prabhu baink new

नां जाम्ह कलाकार जगदिप मन्त

नेवा: अनलाइन न्युज | २०७७ आषाढ २५, बिहिबार ०९:४४:२२

हिन्दि फिल्म ख्यलय् ऐतिहासिक सफल संकिपाया रुपय् नांजागु शोले संकिपाय् सुरमा भोपाली जुया म्हितुम्ह कलाकार जगदिप म्हिगः बुद्धबार बहनी भारतया ई कथं ८.४० ता ईलय् ८१ दँया वैंशय् थःगु हे छेँय् मन्त । सन् १९३९ मार्च २९ खुन्हु जन्मे जूम्ह जगदिप विशेष याना कमेडी आर्टिस्टया रुपय् नांजाम्ह खःसा वयागु वास्तविक नां शैयद ईश्तियाक अहमद जाफरी खः । 

मचाबले निसें हे संकिपाख्यलय् बाल कलाकार जुया म्हितावःम्ह जगदिपया न्हापांगु संकिपा सन् १९५१ य् पिदंगु अफसाना खः । थ्व संकिपाया निर्देशक बी आर चोपडा खः । गुलिखे फिल्मय् बाल कलाकार जुया म्हितुम्ह जगदिपं लिपा निर्देशक गुरु दत्तया आर पार , बिमल रायया दो बिघा जमीन निसें कया पुराना मन्दिर , अन्दान अपना अपना लगायत प्यसःलं मयाक्क संकिपाय् थीथी भुमिका म्हिता स्वकुमिया नुगः त्याकेत ताःलाम्ह खः । जगदिपया स्वम्ह कला दुसाः बलिउडया नांजाम्ह स्टार जावेद जाफरी व नावेद जाफरी लगायत वया खुम्ह मस्त दु । उमेर वने धुंका संकिपा ख्यलं तापाना च्वंम्ह जगदिप छुं ई न्ह्यः ई निसें छेँय् च्वना च्वंम्ह खःसा क्यान्सर ल्वचं कया वासः याका च्वंम्ह खः ।

 

Categorized in कला