ब्रेकिंग

  • निषेधाज्ञा ::: स्वनिगलय् श्रावण २७ गतेतक निषेधाज्ञा थप ।
zero media family planning adv

नव प्रतिष्ठापित श्री कुमारी, श्री गणेश व श्री भैरवया संकल्प पुजा

नेवा: अनलाइन न्युज – विजयरत्न | २०७८ श्रावण २, शनिबार १०:२४:२०

जुजु जयप्रकाश मल्लया पालंनिसें प्रचलन शुरू याःगु जीवित द्यःपिं मध्य मुलरूपं येँयाःबले पुज्याइपिं श्री कुमारी, श्री गणेश व श्री भैरवया राष्ट्रप्रमुखपाखें संकल्प पुजा यात।  

शाक्य महाविहार संघया ग्वसालय् राष्ट्रपति भवनय् राष्ट्रपति विद्यादेवी भण्डारीपाखें पुजा ज्वलं संकल्प याकेधुंकाः गणेश व भैरवयात बसन्तपुरया कुमारी छेँय् हःगु खः । अले स्वंम्हं जीवित द्यःपिनिगु पुजा कुमारी छेँय् याःगु खः ।

निवर्तमान श्री गणेश (संवेग शाक्य) व श्री भैरव (रुजन शाक्य)यात ई व उमेरया कारणं युवा अवस्थाय् थ्यंगुलिं नियमकथं वयकःपिन्त विदा याना न्हूम्ह द्यःपिं ल्ययेत शाक्य कुलया १६ विहारय् सूचं छ्वया शाक्य कुलपुत्रपिनिगु निवेदन व जातःया आधारलिसें पंचाङ्ग निर्णायक समितिया सिफारिस कथं देय्या अवस्थालिसे ज्वःलाःगु गुणदोष, लक्षण व नक्षत्रया आधारय् भाष्कर देव संस्कारीत केशचन्द्र कृत पारावर्त महाविहार इतुंबहालया शाक्य कुलपुत्र रोदिन शाक्ययात नव प्रतिस्थापित याःगु  खँ शाक्य महाविहार संघया नायः शुभकाजी शाक्यं कनादिल । 

श्री गणेशया रूपय् रोदिन शाक्ययात वि सं २०७७ पौष ३ गते प्रतिस्थापन याःगु खः।

उकथं हे नव प्रतिस्थापित श्री भैरवया रुपय् कीर्तिपूण्य महाविहार क्वहिति बहाया शाक्य कुलपुत्र कर्सनव शाक्ययात वि सं २०७७ पौष ४ गते विधिवत रुपं प्रतिस्थापन याःगु खँ महाविहार संघया मूछ्यान्जे संघरत्न शाक्यं जानकारी बियादिल ।

संकल्प पुजाया लसताय् आमन्त्रित सकलसित प्रसाद कथं नेवाः भ्वय् नं नकूगु खः । उगु भ्वजय्  पूर्वमन्त्री कृष्णगोपाल श्रेष्ठ, येँ महानगरपालिकाया उपप्रमुख हरिप्रभा श्रेष्ठ खड्गी,  बागमती प्रदेशया सांसदपिं राजेश शाक्य, अजय क्रान्ति शाक्य, शोभा शाक्यया नापनापं आपालं हनेबहःपिं व्यक्तित्वपिन्सं ब्वति कयादीगु खः ।

Categorized in नेवाः