dudha jayanti 2568

नक्कली भुटानी शरणार्थी प्रकरण : आरजु व खाँणया विषयस मौन

नेवा: अनलाइन न्युज – ललेन्द्र शाक्य | २०८० जेठ १०, बुधबार १३:४०:१७

नक्कली भुटानी शरणार्थी प्रकरणय् अनुसन्धान यानाच्वंपिं प्रहरीं पूर्वगृहमन्त्री बालकृष्ण खाँणयात २७ बैशाखय् हे गिरफ्तार याःगु खः ।

अनुसन्धान अधिकृतपिनिगु कथं ठगी याःगु गिरोहं खाँण गृहमन्त्री जूगु इलय् पूर्वसहसचिव बालकृष्ण पन्थी नेतृत्वया कार्यदलया प्रतिवेदन थःपिनिगु अनुकुल सचेयायेगु कुतः याःगु खः ।

खाँणं पूर्वसहसचिव पन्थीया प्रतिवेदन सचेयायेत धासें जिल्ला प्रशासन ज्याकुथि, झापाया सहायक प्रमुख जिल्ला अधिकारी चोमेन्द्र न्यौपानेया अध्यक्षताय् प्रतिवेदन पुनरावलोकन यायेत मेगु समिति दयेकूगु खः । समितिं ज्या यायेधुंकाः लिपा तत्कालीन गृहसचिव टेकनारायण पाण्डें मन्त्रालयया स्थानीय प्रशासन व प्रदेश समन्वय शाखाय् दूगु प्रतिवेदन हे कीर्ते याःगु खः ।

थ्व प्रकरणय् वया संलग्नता दूगु खनाः हे गिरफ्तार याःगु खः । तर उच्च पदस्थापिन्सं लहिनातःपिं सानु भण्डारी व केशव दुलाल थःपिनिगु बयानय् धाःसा बालकृष्ण खाँणबारे मौन जूगु दु ।

तत्कालीन गृहसचिव टेकनारायण पाण्डें नं आरोपी केशव दुलाल व तत्कालीन गृहमन्त्री खाँणदथुइ तप्यंक सम्पर्क जुइगु जुयाः वंं ज्वनावःगु रकम तप्यंक मन्त्रीयात बिल वा सचिवालयपाखें मेपिं सुंयात बिल धैगु थःपिन्त च्यूताः, लोभ वा संलग्ना मदूगु धाःगु दु ।

थ्व प्रकरणय् सार्वजनिक जूगु अडियो संवादय् खाँणया जहान मञ्जु व तत्कालीन प्रधानमन्त्री शेरबहादुर देउवाया जहान आरजु राणा देउवाया नं नां मुछेजूगु खः । मञ्जु व आरजुं नं रकम बियागु धासें आरोपी सन्देश शर्मां पीडित गजेन्द्र बुढाथोकीयात धाःगु अडियो सार्वजनिक जूगु खः ।

तर, सरकारी वकिलं तयार याःगु प्रतिवेदनय् दुथ्याःगु बयानय् शर्मां बुढाथोकी व रामकुमार रेग्मीं न्हापा हे फोन यानाः दां काःम्ह मनुखं समस्याय् लाकल धासें इपिं वःगु इलय् फोन यायेगु धासें इमित दां बुझेयानागु धकाः जानकारी ब्यूबलय् थःपिं बचेजुइगु धकाः अथे न्वःवाके ब्यूगु दाबी याःगु दु ।

वया बयानय् दु, ‘निजपिन्सं धाः कथं आरजु देउवा राणा व बालकृष्ण खाँण व मञ्जु खाँणया तकं नां कयाः जिं दां बुझेयानागु खः धकाः खँ धयागु खः, उगु खँ बास्तविक मखु । जाहेरवालापिन्सं धाःगु खँ बास्तविक मखु, जिं निजपिन्त म्हमस्यू । म्ह हे मस्यूम्ह व्यक्तियात थुलिमछि दां नगद हे विना ज्या बिइगु खँ हे मजुल ।’

अडियो तोडमोड यानाः अनुकूल छ्यलाबुला तकं याःगु वया दाबी दु ।

Categorized in दुर्घटना-अपराध