- नर्मदेश्वर प्रधान

‘रोम’ नगरय् मि च्याइ । मित्या पिहां वइ । प्यखेरं छ्वइ । तर उबलय्या शासक नीरो । थःगु देय् मि छ्वःगु इलय् बेला थानाः बेलाया धूनय् नीरो मस्त जुइ । रोम भष्म जुइत्यनी । वयात छुं च्यूताः दइमखु । आनन्दं संगीतय् दुनाच्वनी । जुजु नीरोया थ्व पाषाणी, निष्ठुर नुगःयात कयाः वयात थौँंतक नं मनूतयसं घृणा याः । तुच्छ शासक कथं कुं ख्युं । छिछि दूरदूर याः ।

नेपालय् नकतिनि तःभुखाय् ब्वइ । भुखाचं देशया राजधानी लगायत यक्व जिल्ला, गांयात क्षतविक्षत यानाबी । प्रभावित क्षेत्रया लाखौं जनतातय् नयेगु, त्वनेगु, द्यनेगु बेठेगान जुइ । इपिं सी नं मफु, म्वाये नं मफुगु स्थितिइ लाइ । सरकारं राहत वितरण व्यवस्थित रुपं यायेमफुत । राहात वितरणया सामान पीडित मनूतय् थाय् थ्यनीमखु । गुलिस्यां राहतया सामान सुचुकी । अझ मियाः तकं नइ । प्रधानमन्त्रीं म्हुतुं धाइ “गैरकानुनी ज्या याःसा मन्त्रीतयत नं बाँकी तयेमखु । जेलय् कुनाबी ।” म्हुतुसि स्वयाः वाकुधि छ्वां वयेकाः चेतावनी बी । तर राहतया अन्धाधुन्ध दुरुपयोग जुलं नं प्रधानमन्त्रीं छु याये फइमखु । सुयातं दण्ड बी फइमखु । खुँ ज्या याइपिंसं लाक्व पाक्व याइ । दण्डहीनता चरम सीमाय् थ्यनी । अपराधीत प्रोत्साहित जुइ । देशया संकटं अझं पार मजूनि । आः बर्षा ऋतु वइ । भुखाचं प्रभावित पहाडी लागाय् पहाडत चिरचिर बायाच्वंगु दु । फुसुफुसु चलः वयाच्वंगु दु । आः मनसुनया वा वल कि पहाडी इलाकाय् चलः वनीगु खतरा वृद्धि जुइ । चलखं पहाड, बस्तीइ तःधंगु विध्वंश यायेफु । पहाडी बस्तीयात स्थानान्तर यानाः सुरक्षित थासय् पुनर्बास याये हथाय् जुइ । इलय् पुनर्बासया व्यवस्था यायेमफुत कि हानं हजारौं मनूतय् चलखं ज्यान वनी । थुकथं तःभुखाचं प्रभावित पर्वत, गां, अझ राजधानीया स्थिति तसकं दर्दनाक जुइ ।

सरकारं पीडित लागाय् याकनं हे माःगु व्यवस्था यायेमाःगु अवस्था खनेदइ । प्रधानमन्त्री, मन्त्री, देशया जिम्मेवार पदय् च्वंपिं सम्पूर्ण प्रशासकतसें देशयात थौं महासंकटं मुक्त यायेत अहोरात्र व्यस्त जुइमाःगु खः । तर दुःखया खँ । देश भुखायया थुज्वःगु घालं रक्ताम्य जुयाच्वंगु इलय् प्रधानमन्त्री, वया राजनीतिक सहयात्रीत फुक्क फुटबल कासाय् रमे जुइ । प्रधानमन्त्रीया थुज्वःगु अविवेकशील पह खनाः वयाके जुजु नीरो दुब्युंगु मनूतसें अनुमान याइ । देश थुकथं क्षतविक्षत जुयाच्वंगु ई । व छु न्हासं तिंतिं न्हुयाः फुटबल खेल क्यनाः जुल ? नुगः धइगु नं मदुम्ह रोमया नीरोया चरम निष्ठुरता नेपाःया थौंया शासकतयके खनेदइ । छगू छगू मिनेट देशय् थौं छटपट जुयाच्वंपिं जनताया हित कल्याणया निंतिं बीमाःगु इलय् प्रधानमन्त्रीज्यु सुयागु हाहालय् लगे जुयाः खेल मैदानय् वनाः तिंतिं न्हुयाः जुइ ? देशया थुज्वःगु आपत विपतया घडिइ प्रधानमन्त्री, नेतात थुलि गैरजिम्मेवार जुइगु शोभनीय जुइ ला ? देशय् हरपल सी–म्वाइया दथुइ कानाः जनतायात थुकिं गुज्वःगु सन्देश बी ? इमिगु नुगः गुलि क्वतुनी ? गुलि ख्वइ ? देशया प्रधानमन्त्रीं बिचाः याये म्वाःला ? थुकिं क्यनी थौंया  थुज्वःगु संकटावस्थाय् नं देशया सरकार, नेतात गम्भीर मजू । लोहं थें सम्वेदनहीन ।

प्रधानमन्त्री, नेतात व कलाकारतय् दथुइ जूगु फुटबल कासायात कयाः छगू पत्रिकां खूब प्रशंसा याइ । ‘छगू हे मैदानय् सरकारी पक्ष व विपक्षी नेतातय् खेलय् सहभाीग जूगुयात तःधंगु राजनीतिक अर्थ बी । नेपाःया थीथी दलया राजनेतात संकीर्ण मखु । उद्धार । इपिं दथुइ गहन आत्मीयता दु धइगुया थ्व दसू खः । थ्व नेपाःया राजनीतिक विशेषता जुयाः खनेदइ । थ्व विश्वया न्ह्यःने सकारात्मक उदाहरण जुइ ।’ धमाधम तारिफ याइपिं खनेदइ । संविधान दयेकेगु खँय् प्यंगूगु दल दथुइ आकस्मिक सहमति जुइ । थ्व फुटबल खेलया हे योगदान खः । धाइपिं दइ । कांपिंसं किसिया म्हय् थियाः अनेक अर्थ छ्याइ, बी थें कथित राजनीतिक विश्लेषक, समीक्षकतसें सहमतिया अर्थयात कयाः मौकाय् चौका ह्वाइ ।

न्यने । प्रधानमन्त्री सुशील कोइरालायात खेल मैदानय् बियातःगु ई २५ मिनेट हँ । स्वास्थ्यया कारणं नं वयकःयात अप्वः ई बीगु जुइमखु । तर मैदानय् वयकःयात फुटबलया नशां तसकं काइ । वयकः ई फुकाः नं मैदानं पिहां वयेत माने जुइमखु । इलय् ब्यलय् हेड याइ । जम्प यानाः बल थ्वाइ । खेल क्यनेत प्रमजु उत्साहित । थःत खेलाडी प्रमाणित यायेत स्वइ ।

संविधान दयेकेगु खेल न्ह्याइ । मैदानय् प्रम सुशील, ओली व प्रचण्ड दथुइ खूब पास मिले जुइ । प्रचण्ड थुज्वःगु कुशल राजनीतिक खेलाडी दुगु प्यंगू दलया संयुक्त टिम । विजय निश्चित जुइ । प्रचण्डं नकुगु फलं विपक्षी चिचीधंगु दलत मैदानय् त्यांग्रात्यांग्रा पूवनी । आः संविधान दयेके धुंकाः सुशील मैदानं पिहां वइ हँ । अले ओली कप्तान जुइ हँ । लिपाया सत्ताया खेलय् खड्ग ओलीं नेतृत्व बी । राजनीतिक खेल हानं सुरु जुइ । न्ह्याकी । फुटबल कासाय् फल तयेगुली माहिर नरशमशेर धाइ । राजनीतिक खेलय् विपक्षीतयत फनफन चाःहिइकेफुम्ह नामूद खेलाडी प्रचण्डजु धाइ । प्रचण्ड थःगु पक्षय् दुगुलिं खड्ग ओलीजु धुक्क जुइ । सत्ता खेलया प्रतिस्पर्धाय् थःगु विजय अवश्यंभावी जुइ, ओलीं लुमं लुमं छाति फुले याइ ।

–०–