nepal investment baink

धापासीइ छम्ह मिजंया हत्या याःगु द्वपनय् छम्ह गिरफ्तार

नेवा: अनलाइन न्युज – ललेन्द्र शाक्य | ने.सं. ११४४ सिल्लाथ्व तृतीया

येँया धापासीइ २३ दँया दिपेश खड्काया हत्या याःगु द्वपनय् छम्ह गिरफ्तारीइ लाःगु दु ।

जिल्ला प्रहरी परिसर येँपाखें खड्काया हत्या द्वपनय् वया छम्ह पासायात गिरफ्तार याःगु खः । गिरफ्तारीइ लाःम्हेसिगु नां प्रहरीं सार्वजनिक याःगु मदुनि ।

सोमवाः पत्रकार सम्मेलन यानाः थुगु विषयस सार्वजनिक यायेगु एसपी कुमोध ढुंगेलं धाःगु दु । प्रहरीया कथं, दिपेश व गिरफ्तारीइ लाःम्ह मनू निम्हं मिस्त्री ज्या यानाः वयाच्वंपिं खः ।

सामान्य विवादय् ज्वःगु ल्वाभःपाखें प्रहार यानाः हत्या याःगु सीदूगु अनुसन्धानय् दुथ्याःम्ह अधिकृतपिन्सं धाःगु दु ।

प्रहरी वृत्त, महाराजगञ्जया पुचलं घटनास्थलय् थ्यंकाः अनुसन्धान न्ह्याकूगु खः । खड्काया सुं सुं पासापिन्त प्रहरीं नियन्त्रणय् काःगु खः ।

छम्ह प्रहरी अधिकृतं धाःगु दु, ‘तर अनुसन्धानलिपा घटनाय् छम्हेसिगु जक संलग्नता खनेदूगु दु, वं कसूर स्वीकार याःगु दु ।’

शनिवाः गौशालाय् नं २८ दँया प्रमिला दमाईया सीम्ह लुयावःगु खः । उकी दुथ्याःगु द्वपनय् प्रहरीं बानेश्वरपाखें छम्हेसित गिरफ्तार याःगु दु ।

एसपी ढुंगेलं धाःगु दु, ‘निगुलिं विषयस सोमवाः जानकारी बिइगु जुइ ।’

Categorized in दुर्घटना-अपराध