ब्रेकिंग

  • निषेधाज्ञा ::: स्वनिगलय् श्रावण २७ गतेतक निषेधाज्ञा थप ।
zero media family planning adv

धात्थें धायेगु खःसा नेपालभाषा हे जिगु ज्यान खः ...म्येहालामि कल्पना श्रेष्ठ

ख्वप जिल्लाया थिमिया न्हूगु गठ्ठाघर छेँ दुम्ह थौंकन्हय् बय् बय् जुयाच्वनादीम्ह म्ये हालामि कल्पना श्रेष्ठ पेशागत रुपं छम्ह शिक्षिका खः । थौंकन्हय् म्येहालामि श्रेष्ठ थिमिया शंखधर मेमोरियल स्कूलय् साइन्स टिचरया रुपं ज्या यानाच्वनादीगु दु । वय्कः म्येहालामि मय्जु कल्पना श्रेष्ठलिसे नेवाः अनलाईनन्यूजया सम्पादक ललेन्द्र शाक्यं यानादीगु खँल्हाबल्हाया छुं अशं थन न्ह्यब्वया च्वना ।

क) कल्पना जु, संगीत ख्यलय् गुबलेनिसें पलाः तयादिया ?

सुभाय् दु ललेन्द्र जु, जि संगीत ख्यलय् वयागु थनी न्यादँ दत । जिगु सांगितिक यात्रा नेपालभाषा संगीत ख्यलं न्ह्याःगु खः ।

ख) संगीत ख्यलय् प्रेरणाया स्रोत ? सु सु खः गुरुपिं ?

संगीत जिगु जीवनया अभिन्न अंग खः । गुकियात जिं प्यासनया रुपं कयागु दु । जिगु प्रेरणाया स्रोत धायेबलय् जिमि बाः खः । वय्कः नं संगीत ख्यःया हे व्यक्तित्व खः । बाःया हे प्रेरणापाखें जि थौं संगीत कलाक्षेत्रय् वयेफूगु खः । जिगु न्हापांम्ह गुरु जि बाः बालमुकुन्द श्रेष्ठ खः । स्कूल ब्वनागु इलय् हनेबहःम्ह डिल्लीराम सर व सुसिला मिस संगीत गुरु जुयादीगु खः । आः धाःसा जि निदँ न्ह्यःनिसें हनेबहःम्ह गुरु बिजय कायस्थलिसे संगीतया ज्ञां कयाः वयाच्वनागु दु ।

ग) छिगु दकले न्हापांगु म्ये छु खः ?

दकले न्हापांगु म्ये नेपालभाषाया म्ये खः जिगु । थ्व म्ये धाःसा जिं भुपेन शाक्यजुलिसे ज्वःम्ये हालागु खः । जिगु दकले न्हापांगु म्येया बोल खः, आहा गुलि बांलाःम्ह छ...। थ्व म्ये प्यदँ न्ह्यः रिकर्ड यानागु खः ।

घ) छितः गुज्वःगु म्ये हाले यः ?

जि थः शान्त स्वभावम्ह जूगुलिं अप्वः धयाथें जितः विशेष यानाः सेन्टिमेन्टल म्ये हे हाये यः । तर, जिगु विचाः कथं छम्ह म्येहालामि जुइधुंकाः न्ह्याग्गु कथंया म्ये हालेत नं तयार जुइमाः ।

ड.) आःतकया दुने ग्वःपु म्ये हालादी धुन ?

आःतक जिं नेपालभाषाया ७ पु म्ये व खस नेपाली भाषाया ४ पु म्ये हालेधुनागु दु । गुगुमध्ये ५ पु म्ये याकः म्ये व २ पु म्ये ज्वःम्ये खः ।

च) अले म्येचाः छु छु पिदनेधुंकल ? म्यूजिक भिडियो छु छु पिदन ?

उम्...म्येचाः हे धकाः ला पिकनागु मदु जिं । तर आःतक जिं ११ पू म्ये हालेधुनागु दु । आःतकया दुने ५ पु म्येया म्यूजिक भिडियो दयेकेधुनागु दु । छुं दिं लिपा जिगु नेपालभाषाया म्येया म्यूजिक भिडियो दयेकेगु ज्याय् पलाः न्ह्याकेगुलि ब्वां जुयाच्वनागु दु ।

छ) सिरपाः छु छु त्याकादी धुन ?

सिरपाःया विषयस धायेबलय्, स्कूल ब्वनागु इलय् जिगु म्ये हालेगु कलायात खनाः जिमि हनेबहःपिं गुरुपिन्सं थीथी कासाय् ब्वति कायेकादीगु खः । उगु कासाय् गुबलें न्हाप, गुबलें ल्यू सिरपाः त्याकेत जि ताःलाःगु दु । वधुंकाः कलेज ब्वनागु इलय् नं थीथी कासाय् जिं ब्वति कायेगु याना व सिरपाः नं त्याकागु दु । ख्वप कलेजय् जूगु कासाय् अन्तर कलेज गायन कासाय् नं जिं ल्यू सिरपाः त्याकागु खः । छुं ई न्ह्यः जक लकडाउनया इलय् जूगु बुद्ध शान्त पार्क अनलाइन बुद्ध भजन म्ये कासा २०७७ स जिं लियांल्यू सिरपाः त्याकागु खः ।

ज) छिगु विचालय् संगीतया परिभाषा छु खः ?

संगीत धयागु म्येग्वः, वाद्य व हुलाप्याखंया समिश्रण खः । जिगु नितिं संगीत धयागु छगू प्यासन हे खः । समाज व राष्ट्रया सेवा अले थःगु मातृभाषा ल्यंकातयेगु कुतलय् जि थुगु क्षेत्रय् समर्पित जुयाः वयाच्वनागु दु ।

झ) कल्पना जु, जीवन छु खः ?

जीवन सरल तरिकां म्वायेगु कला खः । सुख दुःख कःघानाः आज्जु (लक्ष्य) प्राप्त यायेगु हे जीवन खः ।

ञ) संगीत ख्यःया संघर्षया अनुभव छुं दु ?

संगीत ख्यलय् मेहनत व संघर्ष यानाच्वनागु दु । थुगु ख्यलय् वयेन्ह्यः हे जि स्कूल अले कलेजय् म्ये हालेगु यानाः वयाच्वनाम्ह खः । थीथी कासाय् ब्वति कासें गुबले न्हाप, ल्यू सिरपाः त्याकेगु व गुबलें छुं नं सिरपाः त्याके मखनीगु अनुभव दु । थुकथं हे जीवन न्ह्यानाच्वन । जिगु पढाई नं न्ह्यःने वनाच्वन । मू कथंया संघर्ष धाःसा आः प्यदँ न्यादँ न्ह्यःनिसें यानाः वयाच्वनागु दु । संगीत ख्यलय् हे छुं यायेमा: धैगु भाःपियाः जि न्ह्यःने वनाच्वनागु दु ।

त) थौंकन्हय् संगीत ख्यःया स्थिति गथे जुयाच्वंगु छिं खना ?

आःया संगीत ख्यःया स्थितिया विषयस धायेबलय्, अतिकं कम्पिटिसनया जमाना जुयाच्वंगु दु । बांलाःगुसिबें अति बांलाःगु म्ये हालिपिं कलाकारपिं थप जुजुं वयाच्वंगु दु । उकिं थः नं वहे कथं मिहिनेत व परिश्रम यानाः वयाच्वनागु दु । अले आःया जमाना सामाजिक संजाल व यूट्युबया जुयाच्वंगु दु । उकिं म्ये हालाः जक मगाः, म्येयात न्ह्यब्वयेत व हिट यायेत बांलाःगु म्यूजिक भिडियो निर्माण यायेगु नं अति आवश्यक जुयाच्वंगु दु थें जितः ताः ।

थ) नेवाः संगीत ख्यःया स्थिति गथे जुयाच्वंगु तायेकादिया ले छिं ?

आःया परिस्थिति स्वयेबलय् न्हापासिबें आपालं हे इम्प्रुभ जुइधुंकूगु दु । नेपालभाषाया म्येत नं अतिकं स्तरीय कथं दयेके ज्या जुयाः वयाच्वंगु दु । कलाकारपिं नं सुं गैर नेवाः कलाकारपिंसिबें कम मजूथें जिं तायेका । म्यूजिक भिडियो नं मेमेगु भाषाया सिबें स्तरीय कथं निर्माण जुयाः वयाच्वंगु जिं खना ।

द) कन्हय् कंसया पुस्तां नेवाः संगीत, थःगु मांभाय् नेवाः भाय् विस्थापित याइ धकाः धयाः वयाच्वंगु दु । छिगु विचाः छु दु थ्व विषयस ?

झीसं झीगु भाषा, संस्कृति तजिलजियात ल्यंकाः तये हे माः । बचे यानाः तये हे माः । उकिं आःनिसें हे झी सन्ततिपिन्त, न्हू पुस्तापिन्त झीगु भाषा, तजिलजि कला संस्कृति, संगीत इत्यादी स्यने हे माः । झीसं थःगु मांभाषा नेपालभाषा अले कला संस्कृति संगीत ल्यंकातयेत थःगु हे मांभासं खँ ल्हानाः व न्हू पुस्तायात थ्वप्रति आकर्षित यानाः स्यनेगु, ल्हाकेबिइगु व नुगः क्वसायेके बिइगु ज्या झीसं यायेमाः । थथे यात धाःसा न्हू पुस्तापिन्सं नं झीगु मांभाय् कला संस्कृति तजिलजि संस्कृतियात निरन्तरता बियावनी धकाः जिं तायेका ।

ध) छिगु सः गुलि बांलाः, उलि हे छि व छिगु ख्वाः फिगर बांलाः धाइ । छितः गथे ताः ?

हुम्...फूलको आँखामा फूलै संसार...सुभाय् दु ललेन्द्र जु । तर, जितः थथे मताः । जिगु विचालय् धाःसा मिडियाय् वयेत छुं भच्चा बांलाः हे जुइमाःथें च्वं । तर जि बांलाःम्ह व फिगर दुम्ह धाःसा पक्का नं मखुथें च्वं । अय्सां जितः स्वइपिनिगु मिखा बांलाःगु जुया हे जि बांलाःम्ह कथं खंगु जुइमाः ।

न) छिगु विचारय् माया मतिना धैगु छु खः ?

अतिकं न्ह्याइपुगु न्ह्यसः खः थ्व जिगु नितिं । जिगु विचारय् माया मतिना धैगु दुने नुगलंनिसें वइगु भावनात्मक चीज खः । थ्व माया मतिना धैगु निम्ह पासापिनिगु दथुइ जुइफु, छम्ह मां नं थः मचायात याइगु माया मतिना जुइफु । तर जिगु नितिं जि थः छम्ह कलाकार जूगु नातां जिं जिगु नेपालभाषाया क्षेत्रयात अतिकं माया मतिना याये । जिगु थःगु भाषा, जिगु थःगु कला संस्कृति संस्कारलिसे अतिकं गम्भीर रुपं स्वापू दु व दयेकातुं च्वने ।

प) संगीत ख्यःयात गुबलेतक निरन्तरता बियादी छिं ?

गुबलेतक जितः स्वकूमि दर्शकपिन्सं माया हौसला व साथ बियादी, उबलेतक जि थ्व संगीत ख्यलय् पलाः तयातुं च्वने । जिं थःम्हं फक्व व बुरी हे जूसां नं म्ये हालातुं च्वने । विशेष कथं नेपालभाषाया क्षेत्रय् जिं आपालं आपाः सेवा यायेगुलि नुगः क्वसायेका च्वनागु दु । धात्थें धायेगु खःसा नेपालभाषा हे जिगु ज्यान खः ।

फ) कन्हेया आज्जु (लक्ष्य) छु खः ?

आज्जु धैगु वहे छम्ह बांलाःम्ह कलाकार जुइगु हे खः । उकी नं जितः थःगु हे नेपालभाषाया क्षेत्रय् न्ह्यज्यां वनाः बांलाःम्ह कलाकार जुइगु खः । संगीतय् हे अझ यक्वः डुबेजुयाः थःत स्थापित यायेगु हे खः । अझ नं आपालं आपाः मिहेनत अले परिश्रम यायेगु ल्यं दनि । यानातुं च्वने ।

ब) आःया छि गुरु विजय कायस्थया विषयस छुं धयादी कि ? वय्कःलिसेया संगीत शिक्षा गथे च्वं छितः ?

गुरु विजय कायस्थया विषयस धायेबलय्, वय्कः अतिकं सरल, मिहेनती अले शान्त स्वभावया व्यक्तित्व खः । छम्ह भिंम्ह गुरुयाके दयेमाःगु फुक्क गुणत वय्कःयाके दु । गुरु विजय कायस्थलिसे संगीत शिक्षा कायेखंगु हे जिगु नितिं तःधंगु भाग्य खः ।

भ) न्हूगु पिदनेत्यंगु संगीत छु दु ?

लकडाउनय् निपू म्ये रिकर्ड यानागु दु । छपू खस नेपाली भाषाया व मेगु नेपालभाषाया म्ये खः । ई मिलेयानाः थुगु निपुं म्येया म्यूजिक भिडियो दयेकेगु विचाः दु । मनमा कुरा खेल्यो बरै...बोलया खस नेपाली म्येया च्वमि पवन जोशी खःसा, लय् चिनामि राजु सिंह खः । अथेहे, छंगु नं...बोलया नेपालभाषाया म्येया च्वमि दर्शनवीर शाक्य खःसा लय् चिनामि जि गुरु विजय कायस्थ खः ।

म) दकले लिपा कल्पना जु, धाये हे माःगु छुं खँ दु ?

हस् ललेन्द्र जु, दकले लिपा नेवाः अनलाइनन्यूजपाखें जिगु छुं खँत सकलसिथाय् न्ह्यःने ब्वयेगुलि ह्वःताः ब्यूगुलिं छितः दुनुगलंनिसें सुभाय् देछाये । नेवाः अनलाइनन्यूजया सकल ब्वनामिपिन्त इनाप याये कि जिगु म्येत न्यनादिसँ । लाईक सेयर अले कमेन्ट यानादिसँ । जिं छुं गल्ती यानागु दुसा सुधार यायेगु ह्वःताः बियाः माफ बियादिसँ । जितः छिकपिनिगु सल्लाह, सुझाब अले माया मतिना न्ह्याबलें हे आवश्यक जुयाच्वनी । थथेहे माया मतिना अले साथ बियादिसँ । दकलें लिपा, हलिंन्यंकं हे कोभिड १९ कोरोना भाइरस महामारीं ग्रसित व त्रसित जुयाच्वंगु दु । थ्व कोभिड १९ महामारीपाखें मुक्कं हलिमं याकनं हे मुक्ति कायेखनेमा धकाः दुनुगलंनिसें प्रार्थना यानाच्वना । सुभाय्, जय् मां भाय् ।