नेवा: अनलाइन न्युज | २०७६ आषाढ १४, शनिबार ०६:३५:२२

सानुराजा शाक्य

धर्मोदय सभा मुक्कं थेरवादी बौद्धधर्मया गतिविधि न्ह्याकेत निस्वंगु संस्था खः । १०६४ दँ पाखे राणा प्रधानमन्त्री जुद्ध शम्शेरं धार्मिक व जातीय संकीर्ण निति नालाः नेपालं बाद्धै भिक्षुपिन्त देसं पितिन । पित्यूपिं भिक्षुगण भारतया  सारनाथय् छथासं मुना १०६५ दँया कछला महास्थवीर चन्द्रमणिया अदक्ष्यताय् धर्मोदय सभा थापना जुल । थ्व संस्था थापनया उद्देश्य नेपालय् बौद्ध धर्मया प्रचार प्रसार याय्गु खः । उकिया नितिं थी थी प्रकाशन नं पिकाय्गु उद्देश्य ज्वन । थ्व संस्था १०६७ दँया कौलांनिसें नेपाभाषां धर्मोदयपत्रिका पिकाल । तर थ्व पत्रिका पिकना धर्म प्रचार याय्गु जक मखुकि नेपालभाषाया साहित्ययात तःमि याय्त तःधगु योगदान बिल । विश्वय् लोकप्रिय आधुनिक विधायात थ्व पत्रिका मार्फत नेपालभाषाय् दुतिनेगु ज्याय् नं थ्व पत्रिका न्ह्यःने लात । थ्व पत्रिकां मार्फत नेपालभाषाय् न्हू न्हूपिं च्वमिपिं स्थापित जुल । उकिं साहित्य मापत नेपालभाषा आन्दोलनय् तःधंगु भूमिका म्हितेगु ज्या धर्मोदय पत्रिकां याःगुलिं पत्रिकाया प्रकाशक धर्मोदय सभां आन्दोलनय् संस्थागत पलाः न्ह्याकेगु ज्या मचाय्क यात ।
(च्वमि शाक्यं  नेपाल भाषा आन्दोलन १११० निसें ११२६ तक यात कयाः च्वयादिगु शोध – प्रवन्ध पाखें साभार)