- लोककवि राजभाइ जकःमि

धर्म, संस्कृति, जाति न्ह्यलुवाः धन्य खः झी चक्रमान

वैत श्रद्धा – स्वां द्यछाछां झीगु नुगलं याय् सलाम ।

वन व वन निर्वाणया लँय्

राष्ट्र – ध्वाँय् ब्वय्का वन

ख्यलुइताः थें थःत च्याकाः

शान्ति – जः खय्का वन

झीम्ह नेवाः काय् – मचा व देशया हे खः व शान

धर्म, संस्कृति, जाति न्ह्यलुवाः धन्य खः झी चक्रमान ।

‘ज्यापु संस्कृति कोष’ न्ह्याकाः

जातिया छ्यं ल्ह्वंम्ह व

तन – मनं संघर्ष यायां

मुक्तिया लँपु क्यंम्ह व

थःगु जीवन दतल्य भाःपिल थःगु देय् वं थः समान

धर्म, संस्कृति, जाति न्ह्यलुवाः धन्य खः झी चक्रमान ।

व मदुसां नं वैगु नां थौं

कुं – कुलामय् थ्वैच्वन

वैगु मतिना – स्वां नस्वाक्क

झीगु नुगलय् ह्वैच्वन

देय्, समाज व झीगु निंतिं वं बिया वन प्राण दान

धर्म, संस्कृति, जाति न्ह्यलुवाः धन्य खः झी चक्रमान ।

मदुम्ह समाजसेवी चक्रमानया लुमन्तिइ लोककवि राजभाइ जकःमिजुं च्वयादीगु श्रद्धाञ्जली कविता