zero media family planning adv

द्यःयात लाकांमाः क्वखायेकीगु अजूचायापूगु देगः !

२०७३ मङ्सिर ३, शुक्रबार ०९:४५:४४

देगलय् च्वनीपिं द्यःपिन्त स्वां, जाकि, सिन्हः व थीथी प्रसाद छायेगु याइ । वस्त्र, आभुषण व द्रव्य अर्पण नं याइ । तर भारतय् छगू थुज्वःगु द्यःया देगः दु गन द्यःयात लाकांमाः क्वखायेकेगु याइ ।

कर्नाटकया गुलबर्ग जिल्लाय् च्वंगु लकम्मा द्यया देगः दु । अन दँय् दसं लाकां पर्वया ग्वसाः ग्वइ । अले उगु पर्वय् द्यःयात लाकां चप्पल छायेगु नितिं तापाक्कंनिसें मनूत वयेगु याइ ।

द्यःयात लाकां छाइगु उगु पर्वय् खासयानाः गोला बी नांया गांया मनूत आपालं सहभागी जुइ । अजूचायापूगु परम्पराया हुनिं थुगु पर्व नां जाः ।

दँय् दसं दिपावलीया खुन्हुया दिं पर्वया ग्वसाः ग्वइ । मनूत देगः पिनेच्वंगु छम्हा सिमाय् लाकां चप्पल व लाकांमाः हनाः यःखायेगु याइ । अले द्यःयाके आशिर्वाद फ्वनी । लिसें द्यःयात शाकाहारी व मांसाहारी भोजनया भोग नं बिइ ।

थथे द्यःयात लाकां चप्पल छायेबलय् द्यवं मनूतय्त बांमलाःगु खराब शक्तिपाखें रक्षा याइगु विश्वास यानातःगु दु । लिसें थथे लाकां चप्पल छाय्बलय् तुति व जँ स्याइगु ल्वय्या समस्या लनीगु विश्वास नं यानातःगु दु । उु देगलय् हिन्दु जक मखु मुसलमानपिं तकं लाकां चप्पल छायेत वयेगु याः । जनश्रुति कथं भक्तजनपिन्सं छाःगु लाकां चप्पल क्वखाया द्यः चान्हय् गांन्यंकं चाःहिलाः मनूतय्गु रक्षा याइ ।