nepal investment baink

देशयात गालय् लाकीगु फास्ट ट्र्याक मजुइमाः

- नर्मदेश्वर प्रधान

छगू पत्रिकाय् । छम्ह महाकोटिया नेतां माक्र्सया द्वन्द्वात्मक भौतिकवाद व बुद्धया अनात्मकवाद पाखें थः गाक्कं प्रेरित जूगु, प्रभावित जूगु खँ प्रवाहित याइ । 'निगुलिं व हे खः, इमि दथुइ दार्शनिक अन्तर मदु । छगू, छथी खः ।' व्याख्या नं याइ । नेताजुं धाःगु, याःगु व्याख्या गलत, कुंखिनेत्यनागु मखु । कुंखिने नं फइमखु । छकः सुलि पुइवं लाखौंं कार्यकर्तातयत थःगु ल्यू ल्यू सालेफुपिं नेतातयत साधारण मनुखं आलोचना यायेफइमखु । यानाः नं छुं महत्व दइमखु ।

राणा जुजु चन्द्रशमशेरं पःखाः क्यनी । ‘थ्व तप्यं’ धाइ । ल्यू ल्यू च्वनीपिं अनुयायीतसें धाइ ‘खः महाराज ।’ हानं व हे पःखाःयात कयाः जुजु चन्द्रशमशेरं ‘मखु, अंगः ला धेचू थें च्वं, बेक्व’ धाइ । व हे चम्चे अनुयायीतसें हानं ‘खः खः महाराज, धेचू, अंगः बेक्वः’ धाइ । जुजुया खँयात समर्थन याइ । थ्व जुल राणा एकतन्त्री शासनया अवस्था । सामन्ती व्यवस्थाय् शासकतसें मनूतयत दास खंकी । अन्धभक्त तायेकी । इमि छ्यने चुइ । शासन याइ । छु खः, छु मखुया अन महत्व दइमखु । शक्तिं छु धाइ । उकियात खः, खः धायेगु हे सेवकतय् धर्म जुइ । कर्म जुइ । प्रजातन्त्र वइ । जनतां थःगु ब्रह्मं न्ववायेफइ । न्ववाये दइ । वाक स्वतन्त्रता दइ । सुयागुं डर, भर काये मालीमखु । थःगु आत्मा स्याये मालीमखु । विश्वास ब्वलनी । सामन्ती व्यवस्थाय्, निरंकुश प्रणालीं जनताया सःया कदर दइमखु । तर लोकतन्त्र, गणतन्त्रय् अथे जुइमखु । जनता अन शासक जुइ । जनतां थःगु अन्तस्करणयात न्हुइ मालीमखु । आदर्शमय विश्वासं मनूतय् नुगलय् थाय् काइ । मनय् स्वां ह्वइ ।

तर । थौं । राजनीतिक ख्यलय् रुप पाइ । व हे सामन्ती संस्कार, सार विद्यमान खनेदइ । नेतां छु धाल । उकिया हाःहालय् वनेमाः । कार्यकर्तातय् धर्म जुइ । गौरव जुइ । कार्यकर्तातसें नेतातय् विरोध याना हे जुइमाः । विरोध अनिवार्य । धापूया अर्थ अथे मखु । देशयात हाँके याइपिं, प्रबुद्ध नेतातयत कार्यकर्तातसें समर्थन यायेमाः । घ्वायेमाः । वइगु बिचाःयात तेवा बीमाः । अन्यथा देशय् राजनीतिक अराजकता वइ । अनुशासनहीनता खनेदइ । राजनीतिक दलत थुज्वःगु स्थितिइ न्ह्याः वनेफइमखु । तर अनुशासनया नामय् सिद्धान्तहीन, क्षणक्षणय् खँ हीकाः जुइपिं राजनेतातय् अन्धभक्त जुइगु ला कि, मजुइगु ? मनचित्तय् सोचबिचाः प्वंकी । थम्हं धाल कि फुक्क आधिकारिक जुइ । अनुयायीतसें मिखा तिस्सिनाः सही छाप तइ । थुज्वःगु आत्मविश्वास कयाः लाक्वः पाक्वः खँ ल्हानाः, देशयात क्षतविक्षत यायेत स्वइपिं महान् नेतातय् भजनगानय् दुनीपिं भक्तत दु । थ्व ठीक ला ? थौं देशं फयेमाःगु दुःखद् प्रश्न खः थ्व । सिद्धान्तया बखान यानाः जनतायात थनेगु, ह्वायेगु, चाल काइ । जनतायात सिद्धान्तय् भुले याइ । अले भुलभुलैयाय् लाःपिं जनताया छ्यनय् गयाः शक्तिइ, सत्ताय् वनेगु । थ्यंकेगु । कुतः याइ । थौं देशय् नेतातसें आकर्षक सिद्धान्त, आदर्श छ्यली । जनतायात गुकथं म्हितकी । प्रष्ट जुइ । म्हिगः पहिचान, संघीयताया मुद्दाय् अडान कयाः जनतायात उत्तेजित याइ । फक्व खेल म्हिती । भुखाय् ब्वइ । ‘आः परिस्थिति पात । हिल । आः अडानय् च्वने फइमखु ।’ अनेक तर्कत हइ । भुखाय् ब्वये न्ह्यः माक्र्सवादी, पहिचानवादी, संघीयतावादी । भुखाय् ब्वये धुंकाः अवसरवादी । खाउवादी । थ्व नं ला सिद्धान्त ? तर धयां छु याये ? नेतातसें न्ह्यागु धाःसां, याःसां समर्थनय् ज्यान बीपिं हनुमानत दयाच्वनी । अले नेतावर्गं सिद्धान्तय् छाय् अडान काइ ? कार्यकर्तात थः नेतातय् सिद्धान्त प्रति समर्पित जुइमाः । तर नेतातसें छ्यूगु सिद्धान्तहीन पलाः, व्यक्त मनोमानी धारणायात कार्यकर्तातसें विवेक मछ्यसे मूल्यांकन यायेदइमखु । यायेमज्यू ।

महामानव बुद्धया पवित्र दर्शन शील सन्देशयात राजनीतिक पाखण्डी नेतातसें नकाब कथं छ्यलेगु याः । गय् यानाः शक्ति संचय याये ? षडयन्त्र यानां सां गय् यानाः प्रधानमन्त्री जुइ ? सदां दाउ स्वयाच्वनी । शासक जुयाच्वनीपिं नेतातसें महामानव बुद्धं त्याग तपस्यायात, शान्तिया सन्देशयात राजनीतिक प्रयोग यायेत स्वइ । घडि–घडिइ शान्तिया खँ ल्हाइ । घडि–घडिइ क्रान्तिया खँ ल्हाइ । अनुयायीतसें व धाःसां लापा थाइ । थ्व धाःसां लापा थाइ । नेतात मख्ख जुइ । छम्ह क्रान्तिकारी नेतां ला थः भिक्षु जुइगु मनशाय प्वंकी । का थ्व ला अशोक हे जुइ त्यन ला ? जनताय् भ्रम थनी । यथार्थय् थुज्वःपिं महान नेतातय् राजनीतिक वृत्तय् गुज्वःगु भूमिका जुयाच्वनी, छर्लङ्ग जुइ । अथे हे मेम्ह महापुरुषया नं उतिकं दुरुपयोग जुइ । व खः कार्ल माक्र्स । खः कार्ल माक्र्सयात विश्वास मयाइपिं दइ । ठीक जू । तर विश्वास याइपिंसं विश्वासया नामय् माक्र्सयात खेलौना यायेगु उचित जुइ ला ? थौं माक्र्सवादी नेतातसें वर्गीय द्वन्द्वया छाय् उच्चारण यायेमफुत ? उत्पीडित जनता, दलित, महिला, सीमान्तकृत जनताया मुद्दायात गय् भुखाचं ल्हात ? छगू भुखाययात त्वहः चिनाः सिद्धान्त त्वःताः जुइपिं नेतातयत सिद्धान्तवादी धायेगु ला कि मधायेगु ? सर्वहारा वर्गया नामय् राजनीति यायेगु व साबेल थियाः, अप्पा छ्यनय् ल्ह्वनाः तस्बिर कयाः श्रमजीविया नाटक यायेगु । व हे खः ला ? मखु, व जनता ध्वं लायेगु ज्या जक जुइ ।

जिन्दगीभर हि, चःति हायेकाः छपे नयेगु, छजू पुनेगु पाखें बन्चित जुइमाःपिं लाखांै श्रमजीवि किसानत दु । तःभुखाचं श्रमजीवि, किसान निम्न वर्गतय् जीवनयात झं गालय् लाका ब्यूगु दु । पलख सावेल ज्वनाः, सिँग्वः ल्ह्वनाः श्रमजीवि जूपिं नेतातय् प्रशंसा जुइ । तस्बिर वइ । इमिसं जनताया सेवा यानागु धाक याइ । प्रचारप्रसार याइ । थौंया प्रचलित नकाबवादया थ्व दसि खः ।

थौं संविधान दयेकेगु नामय् फास्ट ट्र्याकया खँ हइ । दंदँ तक संविधान दयेकेगु नामय् गफ हाँके याइ । लाखौं लाख दां झ्वाम्म याइ । उबलय् छाय् फास्ट ट्र्याकया खँ मवल ? तःभुखायया नामय् जनतायात राहत बीगु खँय् धाँधली याइ । लुट याइ । जनताया ध्यान रातारात संविधान निर्माणय् साली । राहत वितरणपाखे ध्यान मेखे छ्वइ ।

सुयात प्रधानमन्त्री यायेगु ? सुयात राष्ट्रपति यायेगु ? हिसाब किताब दयेकी । संविधान निर्माणया नकाब पुइ । फास्ट ट्र्याकया खँ ल्हाइ । अझ प्रमं ला फास्ट फास्ट ट्र्याकया खँ हइ । उद्देश्य शक्ति हड्पे यायेगु जुइ ।

प्रधानमन्त्री हीकेवं भिनीगु देशया अवस्था मखु । महत्वाकांक्षी नेतातसें थुइकेमाः । प्रधानमन्त्री जुइगु लहडं जक देशया राजनीति संचालन यायेगु दुस्वप्नय् थौं नेतात तनी । तनाच्वंगु दु । थुलि हे उद्देश्य कयाः जायेगु, ल्वाकेगु, षडयन्त्र यायेगु ज्या जुइ । ततःधंगु राजनीतिक उपलब्धिया दाबा याइ । फास्ट ट्र्याकया खँ हयाः घारघुर यायेत स्वइ । संविधान निर्माणया फास्ट ट्र्याक देशयात अभंm गालय् लाकीगु फास्ट ट्र्याक मजुइमाः । आशा याये ।