newayatataad 2

देवघाट वयेमते : समिति

नेवा: अनलाइन न्युज – ललेन्द्र शाक्य | २०७७ मङ्सिर ११, बिहिबार ११:१२:५६

चितवनया पवित्र धार्मिक तीर्थस्थल देवघाटय् पर्वया झ्वलय् भक्तजन व श्रद्धालुपिन्त मवयेत इनाप याःगु दु । देवघाट क्षेत्र विकास समितिं कोभिड १९ या संक्रमणया जोखिम यथावत् जूगुलिं देवघाट मवयेत इनाप याःगु खः ।

समितिया कार्यकारी निर्देशक धीरणबाबु घिमिरें बुधवाः विज्ञप्ति पिथनाः हरिबोधिनी एकादशी, बालाचःह्रे लिसेंया मेला पर्वय् मवयेत इनाप याःगु खः ।

विज्ञप्तिइ थीथी धार्मिक, सांस्कृतिक महत्वया मेला पर्वय् देवघाटधामय् श्रद्धालुपिनिगु तःधंगु भीड जुइगु परम्परा दयाः वयाच्वंगु जूसां नं कोरोना भाइरस संक्रमणया जोखिम यथावत् हे जूगु व मेला पर्व, उत्सव यानाः भीडभाड मयायेगु सरकारया नीति कायम हे दूगु न्ह्यथनातःगु दु । परिस्थितिवश याःगु इनापयात फुक्कसिन मनन यानाः छेँय् हे च्वनाः परम्परा कथं न्यायेकेत तकं इनाप याःगु दु ।

देवघाटधामय् आपालं बृद्धबृद्धा च्वनीगु जुयाः वयाच्वंगु दु । ख्वाउँगु मौसमय् बृद्धबृद्धापिन्त संक्रमण जूसां थाकुइगु अवस्था वफेफूगु समितिया नायः शिवराज पौडेलं धाःगु दु । वया कथं अन्त्येष्टि कर्मय् तकं सम्भव जुतले म्हो जक मनूत वयेत इनाप यानागु धाःगु दु ।

देवघाटधामय् अमाई, पुन्ही, एकादशी, घ्यःचाकु सँल्हु, बालाचःह्रे, शिवरात्री, साउने संक्रान्ति लगायतया पवित्र दिनय् म्वः ल्हुइन आपालं तःधंगु ल्याखय् भक्तजनपिं वनीगु परम्परा न्ह्यानाः वयाच्वंगु दु ।

Categorized in स्थानिय-समाज