1142 nhoo dan adv

देउवाकालय् अमेरिकी अधिकारीपिं भकाभक नेपाः भ्रमणय् !

नेवा: अनलाइन न्युज – ललेन्द्र शाक्य | २०७८ मङ्सिर १, बुधबार १५:५७:१७

नेपाली कांग्रेसया सभापति शेरबहादुर देउवा प्रधानमन्त्री जुइधुंकाः नेपालय् अमेरिकी अधिकारीपिनिगु धमाधम भ्रमणत जुयाः वयाच्वंगु दु । देउवा प्रधानमन्त्री जुइखतं एमसीसीया उपप्रमुख फतिमा सुमार नेपाः भ्रमणय् वःगु खः ।

देउवा थ्वसिबें न्ह्यः प्रधानमन्त्री जूबलय् हे एमसीसीइ सम्झौता जूगु खः । देउवा प्रधानमन्त्री जुइधुंकाः थुकियात पारित यायेगु पहल अप्वःगु दु । तर, दलत दथुइ सहमति जुइमफुबलय् ५० अर्ब नेपाली दां बराबरया आर्थिक ग्वाहालि सम्बन्धी सम्झौता पारित जुइफूगु मदुनि ।

अमेरिकी सहायक विदेशमन्त्री डोनाल्ड लूया थौं बुधवाःनिसें नेपाः भ्रमण जूगु दु । व दक्षिण व मधय एसियाली मामला स्वइम्ह अमेरिकी उच्च अधिकारी खः ।

लू एसियाली मूलया अमेरिकी खः । वं अमेरिकी विदेश मन्त्रालयया कर्मचारीया रुपं भारत व पाकिस्तानय् तकं ज्या यायेधुंकूगु दु । ओबामा राष्ट्रपति जूबलय् अल्बानिया व किर्गिजस्तानया राजदूत तकं जूम्ह खः ।

लू बुधवाः थ्यंकीसा लू वःगु कन्हय् कुन्हु बिहिवाः दक्षिण व मध्य एसियाली मामिला स्वइम्ह अमेरिकी उपसहायक विदेशमन्त्री केल्ली किडरलिङ नं नेपाः वयेत्यंगु दु ।

अमेरिकी दूतावासं थुकिया बारे जानकारी बिइधुंकूगु दु । वं नेपाःया उच्च अधिकारीनिसें नागरिक समाजया न्ह्यलुवाःपिन्त नापलाइगु तय जूगु जानकारी ब्यूगु दु ।

देउवाकालय् अमेरिकी अधिकारीपिनिगु भ्रमण अप्वःगुयात च्यूताःया लिसें स्वःगु दु । थ्वसिबें न्ह्यः बेलायत भ्रमणय् वं अमेरिकी राष्ट्रपति जो वाइडेनलिसे भेटवार्ता याःगु खः ।

अमेरिकां चीनया च्यूताः दक्षिण एसियाय् अप्वयेकेधुंकाः सतर्कता छ्यःगु दु । वं नेपालय् अतिकं च्यूताः अप्वयेकाः वयाच्वंगु दु ।

Categorized in अन्तर्राष्ट्रिय