Mohanai 2078 KTM

देउवां कांग्रेसपाखें ग्वःम्ह मिसापिन्त मन्त्री दयेकी ?

नेवा: अनलाइन न्युज – ललेन्द्र शाक्य | २०७८ आश्विन २२, शुक्रबार १२:३०:१८

नेपाली कांग्रेसया संस्थापक नेता वीपी कोइराला उज्वःम्ह प्रधानमन्त्री खः, गुम्हेस्यां न्हापांगुखुसि क्याबिनेटय् मिसायात मन्त्री दयेकेल । वया मन्त्रिमण्डलया दुजः द्वारिकादेवी ठकुरानी नेपाःया न्हापांम्ह मिसा मन्त्री खः । तर, वीपीं पलिस्था याःगु दल नेपाली कांग्रेसया सभापति शेरबहादुर देउवा थुगुखुसि प्रधानमन्त्री जूबलय् थःगु दलपाखें सुं नं मिसापिन्त मन्त्री दयेकूगु मदुनि ।

देउवां तःक्वःमछि यानाः स्वक्वः मन्त्रिमण्डलय् न्हूपिं मन्त्री थप यायेधुंकूगु दु । थः प्रधानमन्त्री जुइखतं बालकृष्ण खाँडयात गृह व ज्ञानेन्द्रबहादुर कार्कीयात कानूनमन्त्री दयेकल । वधुंकाः उमेश श्रेष्ठयात स्वास्थ्य राज्यमन्त्री दयेकल । स्वक्वःगुखुसि मन्त्री थप जूबलय् डा. नारायण खड्कायात परराष्ट्रमन्त्री दयेकल । स्वक्वः मन्त्री दयेकूसां नं मिसापिन्त कःमघाल ।

आः देउवां कांग्रेसपाखें न्याम्ह मन्त्री थप जुइत्यंगु दु । थप जूपिं निम्ह या स्वम्ह बरिष्ठ नेता रामचन्द्र पौडेल पक्षपाखें खः । ल्यंदुम्ह छम्ह पूर्वमहामन्त्री कृष्णप्रसाद सिटौला पक्षपाखें खः । सिटौला पक्षपाखें मिजं हे मन्त्री जुइत्यंगु दु । उमाकान्त चौधरीया नां क्वःछीधुंकूगु दु ।

पौडेल पक्षपाखें मिजंपिनिगु हे दाबी दु । मिसापिं मध्येपाखें सुजता कोइरालाया सम्भावना दु । तर, कोइरालायात पनेगु कुतः जुयाच्वंगु खँ सीदूगु दु ।

देउवां थःगु पक्षपाखें पुष्पा भुसालयात मन्त्री दयेकीगु सम्भावना दु । सुजाता व पुष्पा निम्हं मन्त्री जूसां नं माओवादी बराबर नं जुइमखु । माओवादीं सरकारय् स्वम्ह मिसापिन्त थाय् बिइगु सुनिश्चित यायेधुंकूगु दु । पम्फा भुसाल मन्त्री जुइधुंकूगु दु । शशी श्रेष्ठ व बोधमाया कुमारी यादवया नां क्वःछीधुंकूगु दु ।

जसपापाखें नं मिसायात मन्त्री दयेकीगु निश्चित जूगु दु । कम्ती नं निम्ह मिसा मन्त्री जुइगु कथं धलः तयार याःगु सीदूगु दु ।

Categorized in राजनीति