zero media family planning adv

दिल्ली सरकारं फ्वन कोरोनालिसे ल्वायेत सेनाया ग्वाहालि

नेवा: अनलाइन न्युज – ललेन्द्र शाक्य | २०७८ बैशाख २१, मंगलबार ०९:२७:१२

कोरोना संक्रमणया महामारीलिसे ल्वायेत भारतया न्हूदिल्ली सरकारं सेनाया ग्वाहालि फ्वंगु दु । 

कोभिड केयर सुविधा व आइसीयू युनिट्स न्ह्याकेगु नितिं दिल्ली सरकारं सेनाया ग्वाहालि फ्वंगु खः । सेनाया ग्वाहालि माग यासें दिल्ली सरकारं रक्षा मन्त्रालयस पौ छ्वःगु भारतीय संचारमाध्यमं न्ह्यथंगु दु ।

न्हूदिल्ली कोरोनाया निगूगु लहरपाखें अप्वः लिच्वः लाःगु राज्यमध्ये छगू खः । कोरोना संक्रमणया ल्वगिपिं अप्वयेधुंकाः भारतया राजधानी न्हूदिल्ली आईसीयू बेड व अक्सिजन म्हो जूगुलिं मारय् लानाच्वंगु दु । वंगु छवाः न्ह्यःनिसें भारतय् न्हिथं स्वंगू लखसिबें अप्वः न्हूपिं संक्रमित लुयाः वयाच्वंगु दु । दिल्ली जक न्हिथं नीद्वः (२० हजार) सिबें अप्वः मनूत संक्रमित जुयाच्वंगु दु ।

दिल्लीया उपमुख्यमन्त्री मनिष सिसोदियां धाःगु दु, ‘अक्सिजन ढुवानीया नितिं अतिकं यक्व हे ग्वाहालिया आवश्यक जुयाच्वंगु दु । अक्सिजन वितरणया नितिं सेनायाके ट्रक दुसा ग्वाहालि यानादिसँ । रक्षा अनुसन्धान व विकास संगठन (डिआरडिओ)याके न्यासः बेडया उपचार केन्द्र दु । उज्वःगु हे केन्द्र मेगु दुसां नं ग्वाहालि जुइगु खः ।’

 

Categorized in अन्तर्राष्ट्रिय