नेवा: अनलाइन न्युज | ने.सं. ११४४ चिल्लाथ्व त्रयोदसी (२०८० चैत्र ९ गते) शुक्रवाः

भारतया राजधानी दिल्लीया मुख्यमन्त्री व आम आद्मी पार्टी(आप)या नायः अरविन्द केजरीवाल गिरफ्तारीइ लाःगु दु ।

भारतया वित्तीय अपराध अनुसन्धान निकायं केजरीवालयात गिरफ्तार याःगु वया पार्टी आपं जानकारी ब्यूगु दु ।

कर विभाग अन्तर्गतया प्रवर्तन निर्देशनालयं बिहिवाः सनिलय् केजरीवालया निवासय् खानतलासी यानाः वयात गिरफ्तार याःगु खः ।

भारतया मुख्य विपक्षी कांग्रेस लिसेंयापिन्सं घटनाया विरोध याःगु दु । आपं थः नायः निर्दोष जूगु व राजनीतिक आज्जुं केजरीवालयात गिरफ्तार याःगु धाःगु दु ।

भारतय् वइगु अप्रिल १९ तारिखनिसें लोकसभा निर्वाचन जुइत्यंगु दु । उकी प्रधानमन्त्री नरेन्द्र मोदीया भारतीय जनता पार्टी हाकनं त्याइगु यक्वसिगु आँकलन दु ।

दिल्ली सरकारया मदिरा विक्री नीतिलिसे स्वाःगु भ्रष्टाचारया द्वपंया सम्बन्धय् छानविन यायेत केजरीवालयात गिरफ्तार याःगु भारतीय संचारमाध्यमं जानकारी ब्यूगु दु ।

सन् २०२२ स केजरीवाल सरकारं लागू याःगु उगु नीतिं नीजि क्षेत्रया थोक विक्रेतापिन्त अनुचित लाभ ब्यूगु द्वपं लाःगु दु । आप समर्थकपिन्सं धाःसा उगु नीतिं सरकारी एकाधिकार तोडेयाःगु धयाः वयाच्वंगु दु । निर्देशनालयं उगु विषयस न्यनेकनेया नितिं केजरीवालयात तःक्वःमछि सःतूगु जूसां नं वं तःक्वःमछि उकिया बेवास्ता याःगु खः ।

थुगु हे मुद्दाया सम्बन्धय् केजरीवालया पार्टीया निम्ह नेता संजय सिंह व मनीष सिसोडियायात वंगु दँ गिरफ्तार याःगु खः ।

केजरीवाल गिरफ्तारीइ लायेधुंकाः भारतया प्रमुख प्रतिपक्षी दल कांग्रसया नेतृ प्रियंका गान्धं केजरीवाल गिरफ्तार याःगु घटना गलत व असंवैधानिक जूगु टिप्पणी याःगु दु ।

Categorized in अन्तर्राष्ट्रिय