1142 nhoo dan adv

दिमागयात शान्त व जीवन सफलताया नितिं टिप्स

२०७२ फाल्गुण २७, बिहिबार ११:०४:५३

जीवनय् उतारचढाव वयाच्वनी । थुज्वःगु उतारचढावमय जीवनय् थःत सन्तुलित तयेगु दकले महत्वपूर्ण खँ खः ।

गबलें गबलें पिनेया हल्लाखल्ला बाय् समस्या सा गबलें गबलें थःगु हे दिमागय् जुयाच्वनीगु हलचलं झीत अस्थीर यानाबिइ व थःत सन्तुलित तयेत अतिकं समस्या जुइ । थुज्वःगु इलय् दिमागयात शान्त व सन्तुलित तयेगु नितिं छुं उपायत ज्याख्यलय् वयेफु, गुगु क्वय् बियाकथं दु ः

छक्वखुसिइ छपलाः

थौं छिके गुगु जुयाच्वंगु दु वमध्ये थथे छुं नं जुइमखु गुकिं छितः न्ह्यज्यायेत पंगः मथनेमा । उकिं छक्वखुसिइ छपलाः जक छिनादिसँ । अर्थात् छक्वखुसिइ छगू जक ज्या पूवंक एकाग्रताया नापं व इमान्दारिताया नापं यानादिसँ । निगः नाचाय् तुति तयेगु बाय् छक्वलं यक्व ख्यलय् ल्हाः तयेबलय् असफल जुइगु सम्भावना यक्व दइ । थथे यायेबलय् तनाव जुइ व दिमाग अस्थीर व अधीर जुइ ।

वनेधुंकूगु खँय् चिन्ता कयादीमते ः

न्ह्यानाच्वंगु खुसि लिहां वइमखु धाःथें वनेधुंकूगु खँत चाहे न्ह्याक्व हे पीडादायी जुइमा उकी छिसं आः गुलि खः उलि हे यक्व चिन्ता प्वंकूसां नं उकी छुं फरक जुइमखु । उकिं वनेधुंकूगु खँय् चिन्ता वा पश्ताचाप यानाच्वनेगु अर्थ मदु । उकिं कन्हय्या खँयात कयाः अप्वः चिन्ता बाय् उत्तेजना ब्वलंकेगु नं आवश्यक जुइमखु । थौं छिगु न्ह्यःने छु दु, उकी हे चित्त बुझे यायेगु व बांलाकेगु पाखे कुतः यायेमाः ।

छुं छगू खराब खँयात कयाः मुक्कं दिं बर्बाद यानादीमते ः

छगू ई खराब जुल धकाः न्ह्याबलें अथेहे खराब जुइमखु । उकिं न्हिइ छगू छुं अप्रिय घटना जुल धकाः उकियात नुगलय् म्हितकाः मुक्कं दिं बर्बाद यायेमज्यू । सकारात्मक विचाः यायेमाः व बांमलाःगु अनुभवयात ल्वःमंकेमाः ।

अप्रिय खँय् अल्भे जुयादीमते ः

मुक्कं सफूया कहानी उकिया छगू अध्यायं ध्वाथुइके फइमखु । उकिं छुं छगू गल्तीं हे छिगु मुक्कं प्रतिष्ठा सुनानं क्वह्यंके फइमखु । छिगु चरित्र हत्या यायेत छगू जक खराब घटना पर्याप्त जुइमखु । उकिं जिन्दगीया पानात पुइकाःतुं वनादिसँ । छुं छगू अप्रिय खँ व गल्तीइ अल्झे जुयादीमते ।

जिन्दगी न्ह्याबलें हिलाच्वनी ः

छि गनं फसे जुयाच्वंगु दु, थ्व छगू अनुभव जक खः वास्तविकता मखु । उकिं जि गनं फसे जुयाच्वन धैगु खँ सोचे यानादीमते । जिन्दगी प्रत्येक सेकेण्डय् हिलाच्वंगु जुइ । उकिं वहे ह्यूपाःलिसें थःत नं हिलाःतुं यंकादिसँ ।

कल्पनाय् नियन्त्रण ः

हरेक चिज निक्वः निर्माण जुइ । छक्व दिमागय् व निक्वः वास्तविकताय् । उकिं थःगु कल्पनायात नियन्त्रणय् तयादिसँ । छाय्धाःसा छिगु सोच बाय् कल्पना हे आखिर यथार्थय् परिणत जुइगु खः । थुकिया मतलब दिमागय् नकारात्मक ज्याया कल्पना बाय् सोच दयेके मज्यू । अप्वः महत्वाकांक्षा नं लहिनाः तयेमज्यू ।