nepal investment baink

दान्यहेरा सिरपा समितियात न्येयगु लखतका लल्हात

नेवा: अनलाइन न्युज – निश्चल | २०८० भाद्र २८, बिहिबार १७:१८:४२

नेपालभाषा वाङ्गमय ख्यःया प्राज्ञिक संस्था कथं निस्वनातःगु नेपालभाषा एकेडेमीया ग्वसालय् ने।सं। ११२४ निसें निरन्तर न्ह्याका वया च्वंगु दान्यहेरा सिरपा ज्याझ्वः ताःलाक न्ह्याका यंकेगु ताःतुना थ्व सिरपाया दाता यज्ञरत्न धाख्वाःजुं न्येयगु लख तका लःल्हागु दु । एकेडेमीया चान्सलर यज्ञरत्न धाख्वाःजुं थः अबु मदुम्ह दानरत्न शाक्यया नामं दा अले थः स्वयं या नां पाखें य व थः मदुम्ह जहान हिरादेवी शाक्यया नांपाखें हिरा खँग्वःयात ल्ह्यःया कया दान्यहेरा सिरपा धका नां छूगु खः । 

साहित्य,संगीत व विज्ञान प्रविधी ख्यःयात कःघाना बिया वया च्वंगु थ्व दान्यहेरा सिरपा न्हापा साहित्य व संगीत ख्यः दच्छि दच्छि अतःगाना बिया वया च्वंगु खःसा छम्हेसित दान्यहेरा सिरपा व छम्हेसित दान्यहेरा हःपाः सिरपा धका बिया वया च्वंगु खः । आः थुगुसिइ निसें स्वंगुलिं विधाया छम्ह छम्ह व्यक्तित्वयात लाइफ टाइम एचिभमेंट अवार्ड कथं न्येयद्वः न्येयद्वः तका या दान्यहेरा सिरपा लःल्हायेगु क्वछिउगु दु ।

सिरपाया ग्वसाः ताःलाक न्ह्याका यंकेगु निंतिं छगू दान्यहेरा सिरपा समिती नं निस्वंगु दु । उगु समितिइ नेपालभाषा एकेडेमीया भाइस चान्सलर पदेन अध्यक्ष जुइगु व्यवस्था यानातःगु दु । थुगु व्यवस्था कथं आःयात एकेडेमीया भाइस चान्सलर मल्ल के सुन्दर उगु समितिया नायः जुयादीगु दु । मूक्कं न्याम्ह दुजः दइगु उगु समितिइ दाताया प्रतिनिधि , नेपालभाषा परिषदया प्रतिनिधि, मिसा प्राज्ञ छम्ह छम्ह दुजः व एकेडेमीया दाँभरीं थ्व समितिया नं दाँभरीं जुइगु व्यवस्था यानातःगु दु । थ्व ल्याखँ आः यात एकेडेमीया दाँभरीं वीरप्रसाद भन्सारीं उगु भाला क्वबियादीगु दु । थुकथं निस्वंगु समितियात दाता एकेडेमीया चान्सलर यज्ञरत्न धाख्वाःभाजुं न्येयगु लखतकाया चेक लःल्हानादीगु दुसाः थ्वहे समितिपाखें आवंलि दयदसं दान्यहेरा सिरपा देछायेगु ज्याझ्वः जुइगु जूगु दु

 

 

 

Categorized in नेवाः