prabhu baink new

दशैं नखःया भिन्तुना (ध्याचू च्वसु)

  • केशरत्न शाक्य

 न्ह्याब्लें थें मोहनिया लुखाखलुइ ग्वाराभाइचा थ्यंकः वल ।

‘दशैं नखःया भिन्तुना का न्है । छंगु जीवनय् जायेक सुखशान्ति बास लायेमा !’

‘... भुत्रा सुखशान्ति बास लाइ का ! बरु सुखशान्ति बास लायेमा मखु, छंगु भागय् छगः जाःगु ग्याँस लायेमा धाःसा धकाः ..... ! अजाःगु बकंफुस्लु भिंतुना ....  ।’ जितः मतिइ वल ।

‘आः सुखशान्ति धइगु ला अथे हे खः स्व ग्वारा ! अपाय्जि मोहनिया भ्वय् ज्वरे यायेमानि । नखःत्या, पाहांपिन्त सःतेमानि । ग्याँस छतिं दुगुमखु । उलिमछि पसःपिसः जुयेमानि, थःथितिपिंथाय् वनेमानि । मोटर, मोटरसाइकल चिकं मदयाः ‘शो पिस’ जक जुयाच्वंगु दु । जितः ला ख्वखमख हे धाः । ग्व, सरकारययात सुवाः बीगु ला सराः बीगु ला ?’ जिं धया ।

‘हत्तेरिका, पोजिटिभ जुयाः स्वयेमाः धयागु मखुला ? आः झीथाय् मखंला संसारय् दक्कले ग्यसुलाःगु मध्येयागु क्वालिटिया न्हूगु संविधान वःगु दु । नब्बे प्रतिशत नेपाःमि जनताया नुगः (भोट) दुथ्याःगु धाःगु समावेशी ब्यवस्था वःगु दु । पियर (Pure) गणतन्त्रवादि व वरिजिनल राजतन्त्रवादिया राष्ट्रिय सहमतिं जाःगु सरकार वःगु दु । उकिं, थन स्व बाउ, नुगः क्वतुंके मते । भुतुली ग्याँस मदयाः मन थातय् मलाःसा न्हूगुु उत्कृष्ट संविधान छक्वः लुमंकाः वास्याहां न्ह्यु । बजारय् कृतिम अभावया हुनिं भाःबेसाः थिके जुयाः तं वःसा वरिजिनल राष्ट्रिय सहमतियात लुमंकाः ‘म्वाःलका’ धकाः छक्वः मुसुक्क न्ह्यु । चान्हंन्हिनं मत सिनाः दिक्कदाक्क जूसा देय् छगुलिं झललल मिंक वल धाःगु लोकतन्त्रया जःयात लुमंकाः ह्वाराह्वारां न्ह्यु । देशय् छं मनंतुनाथें जाःगु ह्यूपाःया म्हगस पूमवन धकाः नुगः काइंया मीसा मंत्रीतय् तःधंगु म्हगस पूवंगु खँ लुमंकाः वास्यावास्या न्ह्यु । मसीतले आशावादी जुयाः थःथः स्वयाच्वँ, छन्हुया दिनय् शान्तिसुख कुतुं व हे वइनि, झीगु जीवनय् । का, जि ला वन का, हानं छक्वः भिंतुना न्है दशैं नखःया ।’ ग्वाराभाइचा भाताभातां वन ।

जि नं उघरिमे वया ल्यू ल्यू ब्वाँय् वनाखतं लप्पू ज्वनाः हानं वयात लित हया । ‘मर्खु  ग्वाराचा ! जिं हानं छंगु खँ मथुल, छं छु तेश्रोलिंगी भासं खँ ल्हानाच्वनागु ? छ नं नेवाः, जि नं नेवाः । झीसं ला मोहनि नखःया भिन्तुना धायेमाःका, छु च्वःप्वः मदयेक ‘दशैं नखःया भिन्तुना’ धैच्वनागु व ?’

‘हत्तेरीका लातापाकः ! मोहनि मखु दशैंया हे भिन्तुना खः धया । मखंला अन, सरकारया ज्योतिष बाज्यापिं, राज्यं हे विशेष दर्जा बियाः हनाबना तयातःपिं गुरुपिंसं धाःगु, थौंकुन्हु चाइं कूछिभ्वय्, अष्टमि कन्हेकुन्हु लाखे १०ः५५ बजे सुथे टिका चालं हं । धायेबले तुमा, पालुमा, शक्तिपूजा, मोहनि सिन्हः वालाः नेवाः मोहनि गबले ले ? ह्वतय् लात मखुला ? आः मोहनि हे मदुसेंलि गथे जुयाः मोहनिया भिंतुना जुइ ? उकिं भिंतुना ! भिंतुना !! भिंतुना !!! मोहनिया मखु, दशैंया भिन्तुना !’